Viðbúnaður á Keflavíkurflugvelli vegna yfirgefinnar tösku

Sprengjusveit lögreglu var kölluð út um klukkan 18 í dag vegna yfirgefinnar tösku í suðurbyggingu Keflavíkurflugvallar. Þetta staðfestir Guðjón Helgason, upplýsingafulltrúi Isavia, við Vísi.

Taskan, sem hafði annað hvort gleymst eða verið skilin eftir að sögn Guðjóns, fannst í suðurbyggingu vallarins á sjötta tímanum í dag. Við fundinn var gerð svokölluð snefilatuhugun á töskunni og út úr henni kom rauð niðurstaða, þ.e. að mögulega væri sprengiefni á eða í töskunni. Þá var haft samband við lögreglu sem bað um aðra snefilathugun.

Úr þeirri könnun kom græn niðurstaða, sem þýðir að ekkert sprengiefni mælist. Lögregla tók þá ákvörðun um að nýta atvikið sem æfingu á viðbragðstíma. Guðjón segir fólk þá hafa verið fært frá svæðinu í kringum töskuna.

Samkvæmt upplýsingum frá viðmælanda Vísis á vettvangi vísaði lögregla öllum sem staddir voru í grennd við veitingastaðinn Mathús í suðurbyggingu Keflavíkurflugvallar, þar sem taskan fannst, niður í kjallara. Þegar þar var komið sögu hafði sprengjusveit lögreglu verið kölluð út og var á leiðinni. Sprengjusveitin hefur nú lokið störfum á vettvangi.

Atvikið hafði engin áhrif á flug. Þá gat Guðjón ekki sagt til um afdrif töskunnar.

Uppfært klukkan 19:10: Lögregla hefur lokið störfum á vettvangi og þá hefur töskunni verið komið fyrir á meðal óskilamuna á Keflavíkurflugvelli, að sögn Guðjóns Helgasonar upplýsingafulltrúa Isavia. Þá segir hann æfinguna hafa gengið vel.

Fréttin hefur verið uppfærð.