Öll viðfangsefni borgarinnar eru femínísk

Kvennahreyfingin hefur einsett sér að nálgast öll viðfangsefni borgarstjórnar með kynjagleraugum, rýna í ólíkar þarfir allra kynja og jaðarsettra hópa. Kvennahreyfingin mun nálgast öll viðfangsefni út frá femínísku sjónarhorni, því öll eru þau rammkynjuð.

Skipulagsmál eru jafnréttismál, enda snýst þétting byggðar um bætta nærþjónustu sem léttir á ólaunuðum heimilisstörfum á borð við klippingar, læknisferðir, innkaup, skutl og snatt. Þessi störf eru enn að mestu leyti á herðum kvenna. Þétting byggðar verður þó að taka mið af reynsluheimi kvenna og tryggja upplýst, aðgengileg og aðlaðandi almannarými. Undirgöng og skuggasund vekja ónotatilfinningu margra kvenna sem er óþarfi. Skipuleggjum borgina þannig að fólk geti gengið um hana frjálst og öruggt.

Íþrótta- og tómstundamál eru jafnréttismál, enda eru áhugamál barna talsvert kynjuð. Á meðan hægt er að stunda fótbolta í öllum hverfum borgarinnar (þar sem meirihluti iðkenda eru strákar) þarf að ferðast langar vegalengdir og oft milli hverfa til að geta stundað fimleika (þar sem meirihluti iðkenda eru stelpur). Sundlaugar borgarinnar þarf að endurhanna með tilliti til þarfa transfólks og fatlaðs fólks og taka tillit til fólks sem ekki hefur sama viðhorf til nektar og meginþorri innfæddra Íslendinga.

Menningarmál eru kynjuð, þar sem mikilvægt er að listir séu eftir, um og fyrir fjölbreyttan hóp fólks. Sýnileiki og vegsemd listafólks af öllum kynjum og úr ólíkum hópum skiptir máli, listasýningar og viðburðir þurfa að fjalla um reynsluheim ólíks fólks og þurfa að höfða til fjölbreytileikans.

Velferðarmál eru aldeilis kynjuð, enda verður öll aðstoð og þjónusta að taka mið af ólíkum veruleika kynjanna. Beita verður öllum tiltækum ráðum til að koma í veg fyrir að fatlað fólk og aldrað fólk verði fyrir ofbeldi eða vanrækslu, heldur fái fyrsta flokks þjónustu á jafnréttisgrundvelli.

Skólamálin eru gríðarlega kynjuð, en þar gefst einnig tækifæri til að kenna og valdefla börn til að takast á við staðalmyndir og bein og óbein skilaboð samfélagsins sem hefta tækifæri þeirra og áhugasvið. Stórefling Jafnrétisskólans er eitt stærsta mál Kvennahreyfingarinnar, enda nauðsynlegt að gera betur í þessum efnum.

Á öllum sviðum borgarinnar starfar metnaðarfullt starfsfólk sem gerir sitt besta á hverjum degi til að þjónusta borgarbúa eins vel og hægt er. Hlutverk stjórnmálafólks er að skapa ramma utanum þjónustuna og móta stefnu í ólíkum málaflokkum. Þar skiptir máli að ólík sjónarmið sjáist og heyrist, ekki síst þau kynjuðu. Þau sjónarmið bjóðum við fram í Reykjavík fyrir næsta kjörtímabil. Við heitum því að styðja allar góðar ákvarðanir í þágu aukins frelsis og mannréttinda, að undangenginni ítarlegri femínískri rýningu.