Fyrir tuttugu árum var...?

Eins og hefur verið bent á hér á þessum síðum stefnir framtíðin í að verða algjörlega hræðileg og þá er ágætt að hverfa aftur til fortíðar – nærtækt til að mynda að skreppa ein 20 ár aftur í tímann til ársins 1998 en vísindamenn hafa reiknað út að einmitt þá hafi mannkynið náð sínu hæsta flugi, en flugið hefur sífellt farið lækkandi síðan.

Stærstu málin

Erlendis var stærsta málið og jafnframt eitt skemmtilegasta fréttamál allra tíma Clinton/Lewinsky-hneykslið en það komst í fréttir þetta stórkostlega ár. Bill Clinton, þáverandi Bandaríkjaforseti, hafði átt í sambandi við lærlinginn Monicu Lewinsky frá árinu 1995 – en þetta vitið þið líklega. 

Grínarar og glensarar þessa tíma höfðu nóg að gera við að semja brandara um málið og raunar varð þetta þeim ótæmandi uppspretta efniviðar í fleiri ár eftir skandalinn.

Stærsta málið hér heima á Íslandi var vafalaust hið ódauðlega Kio Briggs mál.

Maður nokkur, Kio Briggs að nafni, var handtekinn í Leifsstöð með 2.000 e-töflur í farangri sínum þann 1. september. Kio lýsti yfir sakleysi sínu og ­skiptust landsmenn í tvo hópa – þá sem trúðu frásögn hans og hina sem gáfu lítið fyrir þessar útskýringar.

Svo fór að Kio var sýknaður og í kjölfarið varð hann algjört djamm-„legend“ í Reykjavík.

Svo yfirgaf hann landið og var stuttu síðar handtekinn í Danmörku með ­e-töflur í fórum sínum.

Annað markvert sem gerðist hér á landi þetta ár var það að um sumarið 1998 voru Hvalfjarðargöngin opnuð, skemmtistaðurinn Tunglið brann til kaldra kola og Listaháskóli Íslands var stofnaður og hóf að dæla út listaspírum.

Einnig komu fram á sjónarsviðið tvær mikilvirkar hljómsveitir í sveitaballasenunni en sveitirnar Írafár og Í svörtum fötum voru báðar stofnaðar þetta blessaða ár.

Tækniár

Ýmislegt markvert gerðist í heimi tækninnar árið 1998 – fyrir það fyrsta kom stýrikerfið Windows 98 út, að margra mati betrungur Windows 95 stýrikerfisins byltingarkennda. Það má segja að Windows 98 hafi verið hálfgert skref í átt að Wind­ows 2000, besta Windows-stýrikerfi allra tíma að mati margra.

Hitt sem gerðist árið 1998 var að Google var stofnað, en í dag er það eitt stærsta fyrirtæki heims.

Í raun hefur þetta fyrirtæki breytt heiminum á margan hátt – og nú er svo komið að það hefur skotið Microsoft ref fyrir rass, en það síðarnefnda var árið 1998 eitt stærsta fyrirtæki heims.

Á þessum tíma voru MP3-spilarar rétt ókomnir á markað og ferðageislaspilarar enn í mikilli notkun. Þetta var því þó nokkurt tímamótaár og þarna fór að fjara undan geisladisknum og þar með tónlistarsölu.

iMac-tölvan kom á markað auk Dreamcast-tölvunnar en hún var upphaf sjöttu kynslóðar leikjatölva, eða átti að vera það – en Dreamcast var alger skellur og Sega hætti í framhaldinu að framleiða leikjatölvur.