Aníta ætlar ekki að keppa í sinni bestu grein á HM

Aníta Hinriksdóttir mun ekki keppa í 800 metra hlaupi á heimsmeistaramótinu í frjálsum íþróttum innanhúss sem fer fram í Birmingham í Englandi um komandi helgi.

Aníta er eini íslenski keppandinn á mótinu og hafði náð lágmörkum í bæði 800 metra og 1500 metra hlaupi en hún á Íslandsmetin í báðum greinum.

„Æfingar hafa gengið vel fyrir 1500 metra hlaupið svo ég hef ákveðið að stefna á það á HM. Það er auk þess spennandi fyrir keppni í 800 og 1500 metra hlaupum utanhúss í sumar að hafa þolgrunn frá vetrinum,“ sagði Aníta Hinriksdóttir í samtali við Sindra Sverrisson í Morgunblaðinu í dag.

Heimsmeistaramótið í frjálsum íþróttum hefst á fimmtudaginn en Aníta keppir í undanrásum 1500 metra hlaupsins klukkan 19.48 á föstudagskvöldið. Komist hún í úrslitin keppir hún kvöldið eftir.

Aníta bætti Íslandsmet sitt í 1500 metra hlaupi um tæpar tíu sekúndur á dögunum en hún hafði þá ekki bætt það í fjögur ár. Íslandsmet hennar í dag er 4:09,54 mínútur.

800 metra hlaupið hefur alltaf verið besta grein Anítu Hinriksdóttur og hún hefur náð mjög góðum árangri í greininni á síðustu tveimur stórmótum innanhúss. Aníta fékk brons á EM innanhúss í fyrra og varð í fimmta sæti á síðasta HM innanhúss.

Þetta verður aftur á móti í fyrsta sinn sem hún keppir í 1500 metra hlaupi á stórmóti en þessi 22 ára hlaupakona er nú á leiðinni á sitt tíundaa stóramót á ferlinum þrátt fyrir ungan aldur.