Myrtur af eltihrelli eftir fyrirlestur um öryggi á internetinu

Einn þekktasti bloggari Japans var stunginn til bana af eltihrelli rétt eftir að hann lauk fyrirlestri um hvernig hægt sé að leiða deilur friðsamlega til lykta á internetinu.

Kenichiro Okamoto, betur þekktur undir höfundanafninu Hagex, hafði verið ofsóttur af manninum á netinu um nokkurt skeið.

Hagex var sjálfur sérfræðingur í netöryggi og starfaði sem slíkur auk þess sem hann gaf netverjum ráð um öryggismál í reglulegum innkomum í japönskum sjónvarpsþáttum.

Morðinginn virðist hafa fengið Hagex á heilann eftir að athugasemdum hans við bloggfærslu var eytt. Hann skráði mörg mismunandi notendanöfn til að geta skilið eftir fleiri athugasemdir en þeim var eytt jafnóðum.

Eftir fyrirlesturinn virðist hann hafa elt Hagex baksviðs og króað hann af á salerni þar sem hann stakk hann margoft með hníf.