Aleksei Oleinik kláraði Mark Hunt á heimavelli

Fyrsta bardagakvöld UFC í Rússlandi fór fram fyrr í kvöld þar sem Aleksei Oleinik kláraði Mark Hunt í aðalbardaga kvöldsins. Þetta var 57. sigur Oleinik á ótrúlegum ferli.

Hinn 41 árs gamli Aleksei Oleinik hefur upplifað ýmislegt á löngum MMA ferli sínum. Sigur hans í kvöld var sennilega hans stærsti á ferlinum en þetta var hans 69. MMA bardagi á ferlinum.

Mark Hunt byrjaði bardagann vel og náði inn góðum höggum inn fyrir vörn Oleinik. Oleinik hefur þó sýnt að hann þarf ekki mörg tækifæri til að ná sigrinum en Oleinik komst fyrir aftan Hunt, dró hann niður í gólfið og kláraði með hengingu.

Rússanum Aleksei Oleinik var vel fagnað í Olimpiyskiy höllinni í Moskvu í kvöld eftir bardagann en af sigrunum 57 var þetta hans 47. eftir uppgjafartak. Ótrúlegar tölur hjá Oleinik en hann sagðist gjarnan vilja fá titilbardaga í viðtalinu eftir bardagann.

Mark Hunt hefur nú tapað tveimur bardögum í röð en var samt brattur eftir bardagann. Hunt sagði að Oleinik hefði náð sigrinum í þetta sinn og óskaði honum til hamingju með góðan sigur. Bardagakvöldið var fínasta skemmtun en öll úrslit kvöldsins má sjá á vef MMA Frétta hér.