Fordæmdi sjálfsvíg í útför drengs sem tók eigið líf

Foreldrar drengs sem féll fyrir eigin hendi hafa kvartað til kirkjunnar yfir framferði prestsins sem jarðsetti son þeirra. Þau segja hann hafa gagnrýnt drenginn fyrir að hafa tekið eigið líf.

Presturinn Don LaCuesta, sem þjónar við Our Lady of Mount Carmel kirkuna í Temperance í Michigan í Bandaríkjunum, sá um útför drengsins sem hét Maison Hullibarger og var átján ára þegar hann framdi sjálfsvíg í byrjun desember.

Við útförina dró presturinn í efa hvort Hullibarger fengi inngöngu í ríki Guðs, þar sem sjálfsvíg sé ófyrirgefanleg synd í hefðbundinni kaþólskri trú. Þessar vangaveltur prestsins ollu eðlilega óhug meðal fjölskyld Hullibarger og annarra útfarargesta.

„Við vildum að hann einbeitti sér að því hvernig Maison lifði, ekki hvernig hann dó,“ sagði móðir Maisons í viðtali við staðarmiðilinn Detroit Free Press.

„Hann stóð þarna og fordæmdi son okkar, kallaði hann í raun syndara. Hann velti því fyrir sér hvort hann [Maison] hafi iðrast nógu mikið til þess að komast inn í himnaríki. Hann sagði orðið „sjálfsvíg“ allt að sex sinnum.“

Kirkjan hefur nú tekið ákvörðun um að LaCuesta fari ekki með umsjón jarðarfara í „náinni framtíð“ en foreldrar Hulliberger segja það ekki vera nóg. Þau vilji að prestinum verði vísað úr starfi.

„Við erum hrædd um að kaþólska kirkjan, eins og hún á til að gera, sendi hann á annan stað og hann geri það sama við einhvern annan.“

Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið.

Nánari upplýsingar hér.