Minniháttar bruni á Litla-Hrauni af mannavöldum

Tilkynnt var um eld á Litla-Hrauni á níunda tímanum í gærkvöld. Starfsmenn fangelsisins náðu að slökkva eldinn sjálfir en slökkviliðið frá Þorlákshöfn hjálpaði til við að reykræsta.

Samkvæmt Pétri Péturssyni, slökkviliðsstjóra Brunavarna Árnessýslu var bruninn af mannavöldum og kom eldurinn upp í álmu þar sem menn búa. Sem betur fer reyndist eldurinn smávægilegur.

„Þetta var auðleyst og fljótgert,“ segir Pétur.

Stundum gerist allt á sömu mínútunni

„Það vildi þarna til að allt gerðist á sömu mínútunni,“ segir Pétur en á sama tíma og tilkynnt var um eld á Litla-Hrauni varð bílslys á Hellisheiði og sinubruni við Selfoss.