Segir 43 milljóna jólagjöf Dags freklegt inngrip í viðkvæman markað

Kærunefnd útboðsmála segir að Degi B. Eggertssyni borgarstjóra og Reykjavíkurborg hafi verið heimilt að kaupa 18.300 leikhúsmiða af Borgarleikhúsinu og greiða fyrir það 43.462.500 milljónir króna og gefa starfsfólki borgarinnar.

Ari Matthíasson Þjóðleikhússtjóri kærði málið til nefndarinnar á þeim forsendum að um væri að ræða frekleg inngrip í viðkvæman markað.

Þjónustukaup en ekki miðar á markaði

„Þegar um svona mikið magn af miðum er að ræða inná tiltölulega lítinn markað fannst mér eðlilegt að kanna hvort slík kaup væru ekki útboðsskyld,“ segir Ari í samtali við Vísi.

„Og nú hefur kærunefndin komist að niðurstöðu um að svo sé ekki af því þetta falli undir Evróputilskipun um þjónustukaup og ég verð bara að una því. Og ég óska öllum til hamingju með að fá miða í Borgarleikhúsið þó ég hefði gjarnan viljað að skiptingin milli leikhúsa á þessari jólagjöf hefði verið jafnari milli leikhúsanna.“

Ari segir að sér hafi yfirsést þessi tæknilegi flötur málsins, að hægt væri að túlka þessi miðakaup sem þjónustukaup, en þar eru miklu hærri viðmið lögð til grundvallar, en ekki að um væri að ræða miða á markaði.

Búið að uppfylla tiltekna þörf

Í niðurstöðunni kemur meðal annars fram að um talsvert mikil inngrip er að ræða; gróflega metið selur Þjóðleikhúsið um 90 þúsund miða á ársgrundvelli sem þýðir þá að 18.300 miðar til líklegra leikhúsgesta, markaður sem Þjóðleikhúsið er á, eru 20 prósent af heildarveltu hússins á ársgrundvelli.

Þarna er búið að uppfylla ákveðna þörf. Þiggjendur gjafarinnar, starfsmenn Reykjavíkurborgar, hafa síður hvata og/eða þörf að kaupa miða í leikhús. Ari telur að þannig sé með óbeinum hætti verið að beina viðskiptum frá Þjóðleikhúsinu. Hann segist telja að eðlilegra hefði verið að reyna að dreifa þessari jólagjöf með miðakaupum til frjálsra leikhópa eða Þjóðleikhússins og þá jafnvel með útboði.