Gylfi var að fá sjálfstraustið aftur: „Þetta er pirrandi“

Gylfi Þór Sigurðsson, leikmaður Everton og lykilmaður íslenska landsliðsins, segir að meiðslin hans komi á mjög slæmum tíma.

Gylfi segist hafa verið að nálgast sitt besta form og fengið tvo leiki í röð á miðjunni en ekki úti á kanti þar sem hann hefur spilað lengst af á þessu tímabili.

„Ég var að spila á miðjunni þar sem ég naut mín. Ég fékk leiki þar gegn Burnley og Brighton og mér fannst ég gera vel,” sagði Gylfi í viðtali á heimasíðu Everton í morgun.

„Mér fannst ég vera að nálgast mitt besta form, mér leið líkamlega vel. Sjálfstraustið var að koma til baka og í liðinu einnig með tvo sigra í röð svo þetta var slæmur tími til að detta út. Þetta er pirrandi en þetta er bara einn af þeim hlutum sem þú verður að sætta þig við."”

Everton er nú þremur stigum á eftir Burnley sem er í sjöunda sætinu en liðið var tveimur stigum frá fallsæti þegar Sam Allardyce tók við liðinu í lok nóvember. 20 stig af 27 stigum á heimavelli hefur verið lykill að árangrinum en árangurinn á útivelli ekki verið til að hrópa húrra fyrir.

„Við höfum þá tilfinningu að við séum að færast í rétta átt. Jafnvægið í liðinu er gott. Við höfum verið öflugir á heimavelli og það hefur verið erfitt að vinna okkur þar.”

„Mér fannst ég geta gefið meira til liðsins í þeirri stöðu sem ég var kominn í. Það er bara gengið á útivelli sem hefur kostað okkur þessi vandræði á tímabilinu. Ég er viss um að við finnum lausn á því og endum tímabilið vel,” sagði Gylfi.