Jonah Hill hefur lagt töluvert af eftir að hafa fengið góð ráð frá vini sínum

Bandaríski leikarinn Jonah Hill hef lagt töluvert af og hafa fjölmiðlar ytra veitt því eftirtekt. Ljósmyndari náði mynd af Hill þegar hann var á leið úr ræktinni í Los Angeles síðastliðinn laugardag og virðist hann hafa verið nokkuð duglegur þar.

Í fyrra kom út myndin War Dogs þar sem Jonah Hill lék annað aðalhlutverkið á móti Miles Teller. Hill bætti á sig nítján kílóum fyrir hlutverkið og var þá orðinn 114 kíló en eftir að tökum War Dogs var lokið ákvað hann að létta sig aftur og leitaði ráða hjá félaga sínum, leikaranum Channing Tatum. Hann sagði frá þessu í spjallþætti Jimmy Fallon í ágúst síðastliðnum.

„Ég spurði hann: „Hey, ef ég borða minna og fæ mér þjálfara, kemst ég þá í betra form?“ Og hann svaraði: „Já, fávitinn þinn, auðvitað. Þetta er það einfaldasta sem hægt er að gera í heiminum.“

Árið 2011 lagði Jonah Hill mikið af, eða um sextán kíló, en hann segir engin töfrabrögð hafa verið á bak við það. „Ég vildi að það hefði verið eitthvað jafn auðvelt líkt og að taka eina pillu eða að hitta einhvern töfraanda. Ég fór hins vegar og hitti næringarfræðing og hann sagði mér hvað ég ætti að borða og hvernig ég gæti breytt út af vananum. Japanskur matur hjálpaði mér mikið.“

Hann hefur áður lagt áherslu á að hann vilji ekki bara grennast, heldur einnig að lifa heilbrigðara lífi. „Að vera heilbrigðari var eitthvað sem kom til með því að þroskast og það er erfitt, því oft á tíðum vill fólk að þú sért alltaf manneskjan sem það man eftir. Ég elska að gera grínmyndir en ég vil þroskast þegar kemur að því hvernig ég hugsa um mig. Ég vil vera góður maður og gera fjölskyldu mína stolta. Og ég vil lifa lengi.“