Sigurður Ingi telur að ríkið þurfi að styðja við sauðfjárbændur

Sigurður Ingi Jóhannsson, formaður Framsóknarflokksins og fyrrverandi landbúnaðarráðherra, telur að stjórnvöld þurfi að grípa inn í vegna umframframleiðslu af lambakjöti.

Bændur funduðu með atvinnuveganefnd Alþingis í gær um stöðu sauðfjárræktar en áætlað er að 1.300 tonn af óseldu lambakjöti verði til í haust þegar slátrun hefst.

Sigurður Ingi segir að fundurinn hafi gengið vel en nú sé mikilvægt að ríkisvaldið komi að málinu. „Fundurinn var mjög góður, upplýsandi af hálfu sauðfjárbænda, Bændasamtakanna og sláturleyfishafa. Staðan er auðvitað grafalvarleg.“

Formaðurinn segir að ytri aðstæður á mörkuðum erlendis hafi orðið til þess að þó að framleiðslan hafi ekki aukist hérlendis að neinu ráði á síðustu árum, þá sé framleitt verulega umfram það sem menn geta selt með góðum hætti.

Hann segir sauðfjárrækt vera grundvallaratvinnugrein í byggðum landsins, líkt og Háskólinn á Akureyri hafi bent á í skýrslu 2015. „Sumt af þessu eru afleiðingar af pólitískum ákvörðunum og þess vegna mjög eðlilegt að ríkisvaldið komi að þessu með inngripum á markaði. Þetta voru yfirvegaðar, gegnumhugsaðar tillögur sem voru lagðar þarna fram. Nú á nefndin fund með ráðherra á mánudaginn og ég vænti þess að ráðuneytið verði komið með greiningu á stöðunni, hversu alvarleg hún er hvað varðar byggðir lands og þessa atvinnugrein og hvaða skynsamlegar leiðir eru þarna til úrbóta.“

Telur þú að þíð gætuð mögulega komið inn með hugmyndir að því að minnka framleiðslu?

„Í þessum hugmyndum bænda þá eru þeir að taka verkefni til sín. Það er ekkert verið að biðja fyrst og fremst um fjármagn frá ríkinu. Það er auðvitað í bland, að fá stuðning ríkisins til ákveðinna aðgerða. Það þarf hugsanlega að gera lagabreytingar hvað varðar útflutningsskyldu og slíka hluti. Fyrst og fremst er greinin sjálf að taka verulega drastískar ákvaranir um það hvernig megi aðlaga framleiðsluna að markaðshorfunum eins og þær eru í dag,“ sagði Sigurður Ingi Jóhannsson, formaður Framsóknarflokksins.