May sakar Rússa um afskipti af kosningum á Vesturlöndum

Theresa May, forsætisráðherra Breta, skaut í gær hörðum skotum á Vladimír Pútín Rússlandsforseta og stjórnvöld þar í landi sem hún sakar um að reyna að hafa áhrif á kosningar í lýðræðisríkjum og um tölvunjósnir.

May sagði í ræðu sinni í kvöldverðarboði í London í gær að ríkistjórn Pútíns væri að reyna að grafa undan frjálsum samfélögum í heiminum. Það geri Rússar meðal annars með því að hafa áhrif á umræðuna með fölskum fréttum á samfélagsmiðlum og með því að sá fræjum óeiningar á Vesturlöndum.

May slær þarna allt annan tón en Donald Trump Bandaríkjaforseti hefur gert en hann ítrekaði á dögunum að hann trúi því ekki að Rússar hafi reynt að hafa áhrif á forsetakosningarnar í Bandaríkjunum í fyrra.

Ástæða þeirrar vissu mun vera sú að Pútín sagði honum að ekkert sé til í ásökununum.