Bjarni biður þá sem vistaðir voru á Kópavogshæli og fjölskyldur þeirra afsökunar

„Það er erfitt, en nauðsynlegt, að horfast í augu við það hversu slæmar aðstæður fatlaðra einstaklinga, barna og fullorðinna, voru á Kópavogshælinu, segir Bjarni Benediktsson í yfirlýsingu forsætisráðherra fyrir hönd ríkisstjórnarinnar vegna skýrslu nefndar sem var skipuð til að kanna vistun barna á Kópavogshæli 1952 til 1993.

Í yfirlýsingunni biður Bjarni þá sem voru vistaðir sem börn á Kópavogshælinu og fjölskyldur þeirra afsökunar á þeirri ómannúðlega meðferð og margháttuðu vanrækslu sem börnin buggu við á hælinu. 

Hann segir að á grundvelli laga um sanngirnisbætur verði unnið að því að bæta þeim sem urðu fyrir ofbeldi eða illri meðferð þann skaða sem af því hefur hlotist.

Skýrslan var rædd á fundi ríkisstjórnar í dag en Bjarni segir að eins og lesa megi í skýrslu nefndarinnar hafði Kópavogshælið ákveðna sérstöðu en önnur vistheimili áttu þó margt sammerkt með hælinu.

„Ljóst er að af rannsókn nefndarinnar má draga ýmsan lærdóm um stöðu fatlaðra barna og foreldra þeirra og almennt um aðbúnað fatlaðs fólks á stofnunum,“ segir Bjarni.

Hann segist afar þakklátur að þessu máli hafi verið gerð svo vönduð og góð skil og telur það mikilvægan hluta af uppgjör við þetta tímabil í sögu þjóðarinnar.

Hann beinir því næst orðum sínum til allra þeirra sem vistaðir voru sem börn á Kópavogshælinu og fjölskyldna þeirra:

„Fyrir hönd ríkisstjórnarinnar bið ég ykkur afsökunar á þeirri ómannúðlegu meðferð og margháttuðu vanrækslu sem börn bjuggu við á Kópavogshælinu. Sömuleiðis bið ég afsökunar allt fatlað fólk, börn og fullorðna, sem hefur verið vistað á stofnunum hér á landi og sætt þar ofbeldi eða illri meðferð.

Sár reynsla verður aldrei bætt að fullu, en á grundvelli laga um sanngirnisbætur verður nú unnið að því að bæta þeim sem urðu fyrir ofbeldi eða illri meðferð þann skaða sem af því hefur hlotist, að því marki sem það er unnt. Þá eru ráðherrar nú að fara yfir tillögur sem settar eru fram í skýrslunni og meta til hvaða ráðstafana verður gripið í því skyni að standa vörð um mannréttindi fatlaðs fólks í íslensku samfélagi.“