Ragga með hlutverk í Vikings-þáttunum

Sunddrottningin og leikkonan Ragnheiður Ragnarsdóttir, betur þekkt sem Ragga Ragnars, hefur verið að gera það gott í Los Angeles undanfarið þar sem hún er búsett ásamt fjölskyldu sinni. Og nýjustu fregnir herma að hún hafi landað hlutverki í þáttunum Vikings sem margir landsmenn kannast við en þeir þættir eru afar vinsælir og fá 8,7 í einkunn á vef IMDb.

Eins og gengur og gerist í þessum bransa eru leikarar bundnir trúnaði og mega ekki tjá sig um hlutverk sín en samkvæmt heimildarmanni Fréttablaðsins eru tökur á nýjustu þáttaröðinni hafnar og Ragnheiður mun hafa plumað sig vel í hlutverki sínu.

Nú geta íslenskir aðdáendur bara beðið spenntir eftir að sjá Ragnheiði í fullum víkingaskrúða á sjónvarpsskjánum í fimmtu seríu af Vikings.

Þess má geta að Vikings-þættirnir segja frá víkingnum Ragnari loðbrók og fjölskyldu hans.