Segjast ekki geta gert upp á milli fjölmargra fátækra og úthluta því ekki pelsum

Fjölskylduhjálp Íslands hefur ákveðið að hætta við að úthluta pelsum frá PETA í dag því ekki sé hægt að gera upp á milli þeirra fjölmörgu sem búa við fátækt á Íslandi. Þetta segir Ásgerður Jóna Flosadóttir, framkvæmdastjóri Fjölskylduhjálpar Íslands, í tilkynningu til fjölmiðla vegna málsins. Pelsarnir eru 200 talsins en Ásgerður Jóna segir skjólstæðinga Fjölskylduhjálpar skipta þúsundum.

„Heimilislausir hafa nú þegar fengið pelsa til að halda á sér hita í óupphituðum húsakynnum og hriplekum kofum,“ segir Ásgerður Jóna í tilkynningunni.

Pelsarnir verða gefnir í þau dýraathvörf sem starfandi eru hér á landi.

Pelsarnir voru gjöf frá alþjóðlegu dýraverndarsamtökunum PETA og höfðu verið merktir með spreyi til að koma í veg fyrir að þeir yrðu seldir. 

Uppátækið var afar umdeilt og sagði Guðrún Ögmundsdóttir, fyrrverandi þingmaður, það vera siðferðislega rangt að merkja fátæka með þessum hætti.