Ingvar og Forlán gætu orðið samherjar

Svo gæti farið að Ingvar Jónsson og Diego Forlán yrðu samherjar hjá norska úrvalsdeildarliðinu Sandefjord.

„Við erum að reyna að fá Forlán til Sandefjord. Þótt hann hafi ekki spilað í hálft ár getur hann bætt ýmsu við liðið,“ sagði norski umboðsmaðurinn Terje Liverød í samtali við NTB en hann vinnur að því að fá Forlán til Sandefjord sem situr í 11. sæti norsku úrvalsdeildarinnar.

Forlán hefur átt afar farsælan feril en hann hefur m.a. leikið með Manchester United, Villarreal, Atlético Madrid og Inter.

Þá lék Forlán 112 landsleiki fyrir Úrúgvæ á árunum 2002-14 og skoraði 36 mörk. Hann var valinn besti leikmaður HM 2010 þar sem Úrúgvæar enduðu í 4. sæti.

Forlán lék síðast með Mumbai City í Indlandi.