Niinistö virðist eiga sigurinn vísan

Stuðningur við finnska forsetann Sauli Niinistö heldur áfram að aukast eftir því sem nær dregur forsetakosningum í Finnlandi. Þetta kemur fram í nýrri skoðanakönnun YLE.

Stuðningur Niinistö mælist nú í kringum 80 prósent, fjórum prósentum meira en í síðustu könnun sem gerð var í síðasta mánuði.

Helsti andstæðingur forsetans, Græninginn Pekka Haavisto, mælist með um tíu prósent stuðning, um fjórum prósentum minna en í október. Þannig mælist Niinistö einnig með meiri stuðning en Haavisto meðal þeirra sem kjósa Græningja. Alls tóku um 1.400 manns þátt í könnuninni.

Forsetakosningar fara fram í Finnlandi þann 28. janúar næstkomandi. Nái enginn frambjóðandi hreinum meirihluta í þeim kosningum verður kosið milli tveggja efstu í síðari umferð, sem fram færi 11. febrúar.

Hinn 69 ára Niinistö tók við embætti forseta árið 2012. Í haust var greint frá því að Niinistö og eiginkona hans, Jenni Haukio, ættu von á barni í febrúar.