Segir styrkina til Viðreisnar vera í samræmi við lög og reglur

Framkvæmdastjóri Viðreisnar fullyrðir að flokkurinn hafi fylgt lögum þegar hann þáði styrk frá Helga Magnússyni fjárfesti í aðdraganda síðustu kosninga.

Fréttablaðið greindi frá því í gær að Viðreisn hefði þegið 2,4 milljónir frá Helga og félögum honum tengdum. Flokkurinn fékk 800 þúsund krónur frá Helga og 800 þúsund krónur frá einkahlutafélögum í eigu Helga. Svo fékk flokkurinn 800 þúsund krónur frá olíufélaginu N1 og Bláa lóninu, en Helgi situr í stjórn beggja fyrirtækja.

„Öll framlög og framkvæmd á þeim er lögum samkvæmt og við höfum lagt mikla vinnu í að tryggja að öll umgjörð á rekstrinum sé fagleg,“ segir Birna Þórarinsdóttir, framkvæmdastjóri Viðreisnar.

Guðbrandur R. Leósson, sérfræðingur hjá Ríkisendurskoðun, segir að skoðun reiknings Viðreisnar hafi verið eftir lögum og hefðbundnu ferli, en reikningurinn verði skoðaður áfram. „Í fyrstu yfirferð sjáum við að það er ekkert athugavert við þetta og þá birtum við reikninginn. Síðan erum við að skoða hvort það eru einhver tengsl milli manna.“

Guðbrandur segir skilgreininguna á tengdum aðilum flókna. „Þetta liggur ekki alveg uppi, en við þekkjum regluna,“ segir hann. Sveinn Arason ríkisendurskoðandi sagði við RÚV í gær að meta þurfi hvort það að styrkja stjórnmálasamtök gegnum fjölda félaga sé í samræmi við lög um fjármál stjórnmálasamtaka. Tilefni sé til að skoða hvort lög um fjármál stjórnmálasamtaka séu nógu skýr.

„Að sjálfsögðu þarf að skoða þessi ákvæði fyrst að ríkisendurskoðandi er að benda á þetta,“ segir Unnur Brá Konráðsdóttir, forseti Alþingis, í samtali við Fréttablaðið.



Fréttin birtist fyrst í Fréttablaðinu