Jakob næststigahæstur í sigri á toppliðinu

Jakob Örn Sigurðarson átti góðan leik þegar Borås Basket vann BC Lulea, 99-90, í sænsku úrvalsdeildinni í körfubolta í kvöld.

Þetta var afar góður sigur hjá Borås en Lulea situr á toppi deildarinnar.

Jakob lék í 33 mínútur og skoraði 23 stig. Landsliðsmaðurinn fyrrverandi var næststigahæstur í liði Borås. Hann tók einnig þrjú fráköst og gaf fjórar stoðsendingar.

Jakob hitti úr sjö af 10 skotum sínum utan af velli, þar af fjórum af sex fyrir utan þriggja stiga línuna. Þriggja stiga nýting Borås í leiknum var frábær, eða 55%.

Borås er áfram í 6. sæti deildarinnar, nú með 30 stig.