Hvar er klukkan?

Svo virðist sem átt hafi verið við mynd af fundi utanríkisráðherra Bandaríkjanna og forseta Afganistan. Telja fjölmiðlar ytra að það hafi verið gert til að gefa í skyn að fundur þeirra hafi farið fram í Kabúl, höfuðborg Afganistan, en ekki í bandarískri herstöð í órafjarlægð.

Myndirnar, sem sjá má hér að ofan, sýna Rex Tillerson og Ashraf Ghani ræðast við í gluggalausu herbergi með sjónvarpsskjá í baksýn. Önnur myndin sýnir þó glögglega klukku og rauða brunabjöllu en á hinni er ekkert slíkt sjáanlegt.

Myndin þar sem búið var að fjarlægja klukkuna og bjölluna fylgdi með fréttatilkynningu afganskra stjórnvalda þar sem fram kom að forsetinn „hafi tekið á móti“ utanríkisráðherranum í Kabúl. Undir það tóku yfirvöld í Washington en tístu mynd af fundinum þar sem glögglega mátti sjá hlutina á veggnum fyrir ofan embættismennina.

Þegar upp komst um misræmið á milli myndanna sendu Bandaríkjamenn frá sér leiðréttingu þar sem það var viðurkennt að fundurinn hafi í raun átt sér stað í Bagram, stærstu herstöð Bandaríkjahers í Afganistan. Hvorki Afganir né Bandaríkjamenn hafa útskýrt af hverju ákveðið var að eiga „augljóslega“ við myndina - eins og sérfræðingur New York Times kemst að orði.

Mikil leynd hefur þó hvílt yfir ferðum Tillersons eftir að loftskeytum var skotið að sendinefnd hans á alþjóðaflugvellinum í Kabúl. Því má ætla að klukkan og bjallan, sem sögð eru lýsandi fyrir herstöðvar Bandaríkjamanna, hafi verið fjarlægð af myndinni til að villa um fyrir mögulegum árásarmönnum.