Ekki bara gera eitthvað

Stafræn markaðssetning er orðin sjálfsagður hluti af markaðsstarfi fyrirtækja. Áhersla fyrirtækja beinist þar sérstaklega að samfélagsmiðlum enda nýta nánast allir eigendur snjalltækja sér þá á einn eða annan hátt. Fyrirtæki eru hins vegar komin mislangt í markaðssetningu á samfélagsmiðlum. Sum eru mjög langt komin og eru með starfsfólk, jafnvel deildir, sem sérhæfa sig eingöngu í stafrænum miðlum. Önnur eru jafnvel nánast týnd og vita ekki alveg í hvorn fótinn þau eiga að stíga þegar kemur að samfélagsmiðlum.

Fyrirtækin vita að þau þurfa að vera þarna en vita ekki alveg hvernig þau eiga að bera sig að né á hvaða miðlum þau eiga að vera. Er til dæmis Facebook málið? Insta­gram? Eða jafnvel LinkedIn? Einhver annar miðill eða allir? Eins vita fyrirtæki oft ekki hvað þau eiga að segja, hvaða skilaboðum á að koma á framfæri fyrir utan að hafa takmarkaða kunnáttu á miðlunum sjálfum. Fyrir vikið enda samfélagsmiðlar sem hálfgerð kvöð á fyrirtækjum og oft á tíðum er verið að reyna að finna eitthvert efni til að setja á þessa miðla með misgóðum árangri. Er þá hvatinn oft sá að fyrirtækið telur sig þurfa að setja eitthvað inn þar sem það er orðið svo langt síðan síðasta færsla var sett inn.

Það sama virkar ekki á öllum miðlum

Það getur verið gott að hafa í huga að gera ekki bara eitthvað og alls ekki mikla þetta fyrir sér. Markaðssetning á samfélagsmiðlum þarf ekki að vera svo mikið mál. Byrjaðu einfalt og lærðu inn á þetta. Mótaðu stefnu er varðar samfélagsmiðla. Spurðu einfaldra spurning eins og hvaða miðlar henta fyrirtækinu best? Hvaða skilaboðum og efni á að koma til skila? Til hvaða markhópa á að ná? Hvað er fyrirtækið til í mikla skuldbindingu til þess að gera þetta vel? Margir átta sig ekki á að því fylgir skuldbinding að fara á samfélagsmiðla. Það þarf að svara skilaboðum og vera virkur en „dauðar“ samfélagsmiðlasíður eru verri en engin síða.

Gott er að byrja á að velja einn miðil og bæta svo við þegar reynsla er komin. Facebook hentar til dæmis einstaklega vel hér á Íslandi en það fer að sjálfsögðu eftir því hver tilgangurinn er.

Settu upp plan til 2-4 vikna í senn. Þar ákveður þú hvaða myndefni þú vilt hafa, hvaða skilaboðum þú vilt ná fram, hvernig textinn á að vera, hvenær á að birta og hversu lengi, hvaða markhópa á að ná til, hvort um sé að ræða færslu eða skuggafærslu og hvað þú ætlar að eyða miklum pening í hverja færslu og/eða auglýsingu. Vertu faglegur með því að skrifa góðan texta, hafa myndir í réttri stærð, linka ef við á og skilgreina tilgang miðað við markmið. Tjákn (emojis) geta lífgað upp á færslur ef þau eru rétt notuð. Gott er að hafa í huga að samfélagsmiðlar eru hluti af heildar markaðsstarfi og birtingum fyrirtækisins og þurfa að tóna við það. Það er samt ekki víst að það sé hægt að nota nákvæmlega sömu rödd á samfélagsmiðlum og á öðrum miðlum. Það virkar hreinlega ekki alltaf það sama á þessum miðlum og í til dæmis sjónvarpi og blöðum.

Skoðaðu árangurinn

Mundu að skoða árangurinn en á samfélagsmiðlum geturðu brugðist strax við. Þú ert í raun alltaf með puttann á púlsinum. Samfélagsmiðlar eru líka kjörinn vettvangur til þess að gera tilraunir og sjá hvaða hlutir virka og virka ekki.

Höfundur er framkvæmdastjóri WebMo Design.

Greinin birtist fyrst í Markaðnum, fylgiriti Fréttablaðsins um viðskipti og fjármál.