Lærisveinar Alfreðs náðu í jafntefli gegn Fuchse Berlin

Lærisveinar Alfreðs Gíslasonar í Kiel gerðu jafntefli við Fuchse Berlin í eina leik dagsins í þýsku úrvalsdeildinni í handbolta.

Leikurinn var hörkuspennandi á lokamínútunum. Fuchse Berlin var einu marki yfir þegar 13 sekúndur lifðu af leiknum. Kiel fékk hins vegar vítakast á lokasekúndunni sem Niclas Ekberg skoraði úr og tryggði Kiel jafntefli.

Bjarki Már Elísson komst ekki á blað fyrir Berlínarliðið í kvöld.

Þetta var fyrsta jafntefli beggja liða í deildinni. Fuchse Berlin fer á toppinn með eins stigs forskot á Rhein-Neckar Löwen sem hafa spilað einum leik færra, en Kiel er í áttuna sæti deildarinnar eftir tíu leiki.