Kristján: „Þeir líta á mig sem Svía“

Rúmt ár er síðan Kristján Andrésson stýrði sænska karlalandsliðinu í handbolta í fyrsta sinn. Kristján tók við sænska liðinu eftir ÓL í Ríó og árangurinn undir hans stjórn hefur verið framúrskarandi. Svíar enduðu t.a.m. í 6. sæti á HM í janúar. Kristján er nú staddur hér á landi vegna tveggja vináttulandsleikja Íslands og Svíþjóðar.

„Ég er mjög ánægður með fyrsta árið. Þetta er ungt lið. Það voru margir reyndir leikmenn sem gáfu ekki lengur kost á sér eftir ÓL. Það er ótrúleg barátta í hópnum og leikmenn sem vilja verða virkilega góðir handboltamenn,“ sagði Kristján í samtali við íþróttadeild.

Kristján, sem lék á sínum tíma 13 landsleiki fyrir Ísland, hefur búið í Svíþjóð nær alla sína ævi. Hann þjálfaði Guif Eskilstuna með góðum árangri áður en honum bauðst að taka við sænska landsliðinu.

Ánægður að vera einn af þeim fremstu

„Þetta er allt annað en að vera með félagslið. Ég er búinn að vinna í sænsku deildinni í rúm 10 ár. Að fá þetta starf, að vinna með bestu leikmönnunum í Svíþjóð, það kemur pressa með því eins og á að vera. Þetta hefur verið mjög skemmtilegt,“ sagði Kristján.

Þegar Kristján var ráðinn þjálfari sænska liðsins töluðu sumir um hann sem einhvers konar skammtímalausn í þjálfarastarfið. Hann gefur slíku umtali lítinn gaum.

„Það eru margir duglegir þjálfarar til í Svíþjóð og það var talað um að það væru einhverjir á undan mér í röðinni. En ég er bara mjög ánægður að vera einn af þeim fremstu í röðinni. Þetta hefur verið skemmtilegt fyrsta ár og ég er ánægðastur með spilamennskuna. Við lentum í 6. sæti á HM og þegar allir eru frískir og heilir erum við með lið sem getur barist um medalíur,“ sagði Kristján.

Það getur verið erfitt fyrir útlending að þjálfa landslið annarrar þjóðar eins og Guðmundur Guðmundsson fékk að kynnast meðan hann var landsliðsþjálfari Danmerkur. Kristján segist ekki hafa fundið fyrir því að vera útlendingur að þjálfa sænska landsliðið.

„Væntingarnar voru ekki miklar og við spiluðum betur en þær gáfu til kynna. Núna eru væntingarnar meiri og það eru væntingar sem mér finnst við eiga að hafa. Það verður spennandi að sjá hvað ég segi eftir nokkra mánuði ef það blæs á móti. Ég er alinn upp mestan hluta í Svíþjóð, hef farið í þjálfaraskóla í Svíþjóð og þeir líta á mig sem Svía,“ sagði Kristján.

HSÍ hafði samband

Hann segir að HSÍ hafi rætt við sig þegar leitin að næsta landsliðsþjálfara Íslands stóð yfir í fyrra.

„Ég veit ekki hvort ég kom til greina. Mér var ekki boðið starfið en það var talað við mig. Það var ekkert meira en það,“ sagði Kristján sem segist mundu hafa tekið við Íslandi hefði honum boðist það.

„Ef ég hefði fengið möguleika? Auðvitað. Það er mikill heiður og stórt hlutverk að vera þjálfari íslenska landsliðsins. Ég hefði ekki getað sagt nei.“

Hin margumtöluðu kynslóðaskipti virðast loksins vera að eiga sér stað í íslenska landsliðinu en hópurinn sem Geir Sveinsson valdi fyrir leikina gegn Svíum er mjög ungur. Kristján er nokkuð bjartsýnn á framhaldið hjá íslenska liðinu.

„Það fer eftir því í hvaða átt þessir ungu leikmenn fara. Við höfum sýnt að við getum náð í medalíu. Verði þeir frískir og fái að verða góðir og sterkir leikmenn í ró og næði eigum við alla möguleika. Mér finnst Ísland alltaf koma til leiks með mikla baráttu. Ég hef trú á því að þetta verði sterkt lið,“ sagði Kristján að lokum. ingvithor@365.is.