Koeman líklegastur til að fá sparkið

Samkvæmt veðbönkum á Englandi er Ronald Koeman líklegasti knattspyrnustjórinn í ensku úrvalsdeildinni til að verða rekinn.

Everton hefur farið illa af stað á tímabilinu og situr í 16. sæti ensku úrvalsdeildarinnar með átta stig, þremur stigum frá fallsæti.

Everton hefur einungis skorað fimm mörk í átta deildarleikjum á tímabilinu. Aðeins Bournemouth (4) og Crystal Palace (2) hafa skorað færri mörk en Bítlaborgarfélagið.

Koeman tók við Everton sumarið 2016 og undir hans stjórn endaði liðið í 7. sæti ensku úrvalsdeildarinnar á síðasta tímabili. Í ár hefur hins vegar lítið gengið, þrátt fyrir að Koeman hafi farið mikinn á félagaskiptamarkaðinum í sumar.

Slaven Bilic, stjóri West Ham, þykir næstlíklegastur til að fá sparkið að mati veðbanka. Craig Shakespeare, stjóri Leicester, kemur þar á eftir. Einn stjóri hefur fengið að fjúka á tímabilinu. Crystal Palace rak Frank de Boer eftir aðeins fjóra leiki og réði Roy Hodgson í staðinn.

Gylfi Þór Sigurðsson og félagar í Everton gerðu 1-1 jafntefli við Brighton í gær. Næsti leikur þeirra er gegn Lyon í Evrópudeildinni á fimmtudaginn.