Valur úr leik eftir stórt tap

Valsmenn eru úr leik í EHF-bikarnum í handbolta eftir níu marka tap gegn Balatonfuredi KSE, frá Ungverjalandi, í síðari leik liðanna í dag, 28-19.  

Báðir leikirnir voru leiknir ytra, en Valsmenn töpuðu fyrri leiknum í gær með fimm marka mun, 27-22 og það var því ljóst að verkefni yrði ærið í dag.

Ungverjarnir voru sterkari á öllum sviðum handboltans, en voru þó bara 14-11 yfir í hálfleik.

Þeir stigu á bensíngjöfina í þeim síðari og unnu að lokum níu marka sigur, 28-19, og því samanlagt, 55-41. Ungir leikmenn Vals fengu að spreyta sig undir restina.

Magnús Óli Magnússon var annan leikinn í röð markahæstur með fimm mörk, en næstur kom Anton Rúnarsson með fjögur.