Vilja auka litagleðina

Kynning: Tískuverslunin 16a, Skólavörðustíg 16a, fagnar ársafmæli á morgun með ljúfum veitingum frá kl. 14-18. Verslunin býður kvenfatnað, töskur og skó.

Árný Marteinsdóttir og Dóróthea Gunnarsdóttir, eigendur verslunarinnar, segja að þegar verslunin var stofnuð á síðasta ári hafi hugmyndin verið sú að auka fataúrval, liti og mynstur. „Okkur fannst vanta liti í fatnað hér á landi. Við heyrðum þetta líka hjá öðrum konum sem töluðu um fábreytt úrval. Hjá okkur er útgangs­punkturinn litir, falleg mynstur og lífsgleði,“ segja þær.

„Við fögnum ársafmælinu á morgun, 22. september, og miðað við móttökurnar síðasta árið verðum við að segja að viðskiptavinir okkar eru himinlifandi yfir nýjum sniðum, björtum litum og góðu verði. Við höfum fengið mikið hrós fyrir vöruúrvalið, bæði frá íslenskum viðskiptavinum og ferðamönnum. Fólki finnst gaman að sjá eitthvað nýtt og öðruvísi. Þetta hefur verið virkilega viðburðaríkt ár hjá okkur,“ segja þær stöllur en lögð er sérstök áhersla á góða og persónulega þjónustu í versluninni.

„Við leggjum metnað okkar í nálægð við viðskiptavininn og höldum sérstök kvennakvöld þegar eftir því er leitað. Þá skapast alveg sérstaklega skemmtileg stemming. Við bjóðum kvennahópum upp á léttar veitingar og sýnum þeim vörurnar með annarri nálgun. Okkur finnst að konur sem klæðast fötum frá okkur skeri sig úr fjöldanum á jákvæðan og kvenlegan hátt. Litir skapa ákveðna gleði og gera samskipti við aðra léttari. Markhópur okkar eru konur á öllum aldri.

Við höfum leitast við að velja hönnuði og framleiðendur eftir bestu sannfæringu. Allt eru þetta gæðamerki sem eru þekkt fyrir vandvirkni og góða hönnun. Má þar nefna King Louie, Sessún, Depeche, Nice Things, Mjuse, Alexander Hotto og Vagabond.

Við höfum gert ýmislegt til þess að hafa umhverfið í versluninni hlýlegt og aðlaðandi. Viðskiptavininum á að líða vel, gefa sér tíma til að skoða og njóta góðrar þjónustu. Við viljum að konur hafi gaman af því að skoða vörurnar, kíkja í gamla miðbæinn og upplifa stemminguna á Skólavörðustígnum,“ segja þær.

King Louie er aðalmerki 16a en það var stofnað árið 1980 af hollensku pari. „Við kolféllum fyrir þessu merki. Hönnuðirnir eru miklir aðdáendur vintage hluta og fannst til dæmis vanta hina fullkomnu svörtu turtle-neck peysu. Þau hönnuðu slíka peysu með Levi’s 501. Eftir það hefur KL vaxið stöðugt en markmið þeirra er að framleiða föt sem gerir fólk hamingjusamt,“ segja þær.

„Það er líka góð tilfinning að KL framleiðir einungis föt við tryggar aðstæður. Fyrirtækið er meðlimur í Fair Wear Foundation en það eru samtök sem skuldbinda sig til að bæta vinnuskilyrði í fataframleiðslu. Þeir hafa strangt eftirlit með að vinnutími sé ekki of langur og barnaþrælkun er ekki samþykkt. Fylgst er með öllu öryggi og vinnuumhverfi. Framleiðendur KL ferðast til Tyrklands og Asíu á hverju ári til að skoða framleiðsluferlið. Þá hafa eigendur KL unnið að jafnrétti í meira en tuttugu ár. Tíu prósent fatnaðarins eru með GOTS, global organic textile standard. Það nýjasta í framleiðslunni er pólýester sem unnið er úr PET-flöskum. Undanfarið hefur KL fengið fjölda verðlauna fyrir mynstur í fatnaði.“

16a er einnig með vandaða ítalska gæðaskó sem henta vel fyrir íslenskt veðurfar auk vinsælu Mjuse skónna í fallegum litum, rétt eins of fötin.

Greinin er unnin í samvinnu með Versluninni 16a. 16a er með síður á Facebook og Instagram sem eru reglulega uppfærðar. Heimasíðan er 16a.is og símanúmerið er 562-0016.