Ríkið vann dómsmál um kauprétt að bústað í þjóðgarðinum á Þingvöllum

Ríkið mátti kaupa sumarhúsið á Valhallarstíg 13 á Þingvöllum segir Héraðsdómur Reykjavíkur sem hafnaði þar með kröfum Sigurðar H. Garðarsson sem hafði áður fengið samþykkt tilboð í bústaðinn hjá fyrri eigendum.

Félagið V86 ehf. keypti bústaðinn á Valhallarstíg 13 sumarið 2007. Á bak við kaupin var annar eigenda V86, Svanur Kristbergsson. Eins og önnur sumarhús í Þingvallaþjóðgarði stendur bústaðurinn á leigulóð í eigu ríkisins. Vegna stefnu Þingvallanefndar um að lóðarleiguréttur sé í höndum einstaklinga en ekki fyrirtækja var leigurétturinn skráður á Svan sjálfan á árinu 2010.

Í ágúst 2012 gerði Sigurður H. Garðarsson tilboð í eignina á Valhallarstíg. Hömlur, dótturfélag Landsbankans, var þá afsalshafi hússins sem verðsett var hjá bankanum og samþykkti tilboðið. V86 var tekið til gjaldþrotaskipta í október 2012.

Upphófst nú afar flókin atburðarás. Þjóðgarðsvörður sendi forsætisráðuneytinu bréf í febrúar 2014 og lýsti þar vilja Þingvallanefndar til að nýta forkaupsrétt og eignast húsið fyrir þær 19,25 milljónir króna sem Sigurður H. Garðarsson hafði boðið í það. Varð það úr að ríkið keypti húsið og færði í umsjá Þingvallanefndar sem, eins og fram hefur komið í Fréttablaðinu, ætlaði sér að fjarlægja húsið og opna aðgang fyrir almenning að bakka Þingvallavatns.

Sigurður undi ekki þessum málalyktum og stefndi ríkinu, Þingvallanefnd, Svani Kristbergssyni auk skiptastjóra þrotabús V86 fyrir héraðsdóm.

Meðal raka Sigurðar var að komið hafi verið langt út fyrir þann 15 daga forkaupsrétt sem Þingvallanefnd hafi í slíkum málum áður en tekin hafi verið ákvörðun um að nýta réttinn og hann því fallinn niður. Þingvallnefnd hafi brotið gróflega reglur um stjórnsýsluhraða og stjórnsýslurétt.

Lögmaður ríkisins sagði engar stjórnsýslureglur, hvorki skráðar né óskráðar, hafa verið brotnar. Kaupsamningur Sigurðar hafi fallið niður tveimur mánuðum eftir dagsetningu hans þar sem í samningnum hafi verið fyrirvari um að Þingvallanefnd samþykkti að framselja lóðarréttindin til hans. Það hafi nefndin ekki gert. Undir þetta sjónarmið lögmanns ríkisins tók Héraðsdómur Reykjavíkur og sýknaði ríkið.

Sigurður segir að enn hafi ekki verið tekin ákvörðun um hvort dómnum verði áfrýjað til Hæstaréttar. Hann tjái sig ekki um málið í bili. Þjóðgarðsnefnd lét rífa bústaðinn í febrúar. Í kaupsamningi Sigurðar var þess einmitt getið að húsið væri ónýtt.