Réttindi barna – skipta þau máli?

Í tíu ár hef ég verið það lánsöm að fá að starfa sem umboðsmaður barna. Lögum samkvæmt geta þau ár ekki verið fleiri og nú er mínum tíma lokið. Þrátt fyrir söknuð yfir því að kveðja finn ég fyrir mikilli gleði. Gleði yfir því að hafa fengið tækifæri til að vera í mínu draumastarfi og sinna þeim verkefnum sem eru mér svo hugleikin. Mér finnst þó mikilvægt að regluleg endurnýjun á umboðsmanni barna eigi sér stað og því kveð ég með þakklæti og gleði í huga.

Með jákvæðni að leiðarljósi

Sem umboðsmaður barna hef ég alltaf reynt að hafa bjartsýni og jákvæðni að leiðarljósi þegar bent er á það sem betur má fara. Að mati sumra er umboðsmaður stundum of róttækur í skoðunum sínum en honum er meðal annars ætlað að hafa frumkvæði að stefnumarkandi umræðu í samfélaginu. Á þessum mikilvægu tímamótum ákvað ég að láta útbúa skýrslu um þær áhyggjur sem ég hef við embættislokin. Skýrsluna er að finna á heimasíðu embættisins barn.is en í henni koma einnig fram hugmyndir að úrbótum. Það er von mín að skýrslan nái eyrum ríkisvaldsins og annarra sem taka ákvarðanir sem varðar börn.

Betur má ef duga skal 

Margt brennur á mér við þessi tímamót, ýmislegt hefur áunnist en betur má ef duga skal. Víða vantar upp á viðhorfin til barna, en börn eru sjálfstæðir einstaklingar með fullgild réttindi og réttindi þeirra eru ekki minni en annarra. Þegar kemur að málefnum barna virðist skortur á fjármagni einkenna málaflokkinn töluvert og væri hægt að benda á mörg mál því til stuðnings. Skýrslan er ekki tæmandi en gefur þó góðar upplýsingar um stöðuna.

Ég vil þakka öllum sem starfað hafa með embættinu síðustu tíu ár, þeim sem hafa leitað til embættisins, krökkunum sem leita til þess, ráðgjafarhópnum sem er stórkostleg uppspretta góðra mála og loks vil ég þakka mínu frábæra starfsfólki fyrir öll árin.