Hverfishetja úr Breiðholtinu Reykvíkingur ársins

Anna Sif Jónsdóttir, formaður foreldrafélags Breiðholtsskóla, er Reykvíkingur ársins 2017. Þetta tilkynnti Dagur B. Eggertsson, borgarstjóri, í morgun þegar Elliðaárnar voru opnaðar.

Er þetta í sjöunda sinn sem borgarstjóri útnefnir Reykvíking ársins en hefð hefur skapast fyrir því að Reykvíkingurinn ársins renni fyrir fyrsta laxinn í Elliðaánum. Anna Sif renndi því fyrir lax í morgun og veiddi einn vænan 56 sentimetra langan fisk.

Anna Sif, sem er löggiltur endurskoðandi og býr í Fornastekk, ólst upp í Seljahverfi og hefur búið í neðra Breiðholti síðan 2003.

„Ég áttaði mig á því að ég ætti eftir að eiga barn í Breiðholtsskóla til 2025 og því væri kannski ágætt að skipta sér af því hvernig þessi skóli væri,“ segir Anna Sif í tilkynningu frá Reykjavíkurborg. Anna Sif á tvö börn í skólanum ennþá en hún á börn á aldrinum 8, 11 og 17 ára.

Hún hefur setið í stjórn foreldrafélagsins frá árinu 2007 og verið fjögur ár sem formaður en í tilnefningunni um hana segir meðal annars:

„Hún hefur á undanförnum árum verið leiðandi í foreldrastarfi í Breiðholtsskóla og samstarfi milli foreldrafélaga allra grunnskóla í Breiðholtinu.  Meðal verkefna sem unnið hefur verið ötullega að eru Fjölmenningarhátíð í neðra Breiðholti og Vorhátíð Breiðholtsskóla sem báðar eru orðnar ómissandi liður í menningu hverfisins.“

Öflugur hópur foreldra kominn í foreldrafélagið

Til að byrja var erfitt að virkja foreldra í starfið og var stjórnin aðeins skipuð tveimur einstaklingum í dálítinn tíma.

„Nú er þetta hins vegar orðinn mjög öflugur foreldrahópur sem stendur að vorhátíð skólans, fjölmenningarhátíð og jólaföndri. Stjórnin er skipuð 20 sterkum einstaklingum sem vinna vel saman. Það sem drífur mig áfram er að reyna að skapa góðar minningar fyrir börnin í hverfinu úr skólanum sínum og ekki síður að efla sjálfsmynd minna eigin barna.  Það hefur verið ofboðslega flottur hópur í þessu félagsstarfi og margir tilbúnir að grípa boltann. Allir ganga í hlutverkin og það er aldrei neitt vandamál með þrif eða annað sem þarf að gera. Starfið snýst  um að skapa góða skólamenningu í kringum skólastarfið. Það er mjög mikilvægt að foreldrar taki þátt í lífi barnanna sinna. Allir geta gert eitthvað, það þarf ekki að taka sæti í stjórn til þess að skipuleggja eina bíóferð fyrir bekkinn eða vinna eitt sjálfboðaverk á vorhátíðinni. Ég myndi gjarnan vilja sjá fleiri foreldra virka í svona sjálfboðaliðastarfi,“ segir Anna Sif sem er vel þekkt í hverfinu.

Þeir sem þekkja vel til starfa hennar segja að hún sé afar öflug og jákvæð í sínu nærsamfélagi.

Hverfishetja

„Hún er ein af hverfishetjunum okkar,“ segir einn sem rætt var við vegna valsins.

Anna Sif kemur víða við í félagsstarfi og situr meðal annars í Hollvinasamtökum Elliðaárdals auk þess að vinna að Fjölmenningarhátíðinni í Breiðholti sem hefur verið haldin tvisvar sinnum við miklar vinsældir og góðan orðstír.

„Hér hefur orðið mikil fjölgun innflytjenda og að mínu mati verðum við að halda betur utan um þá. Hér í Breiðholtinu er góður hverfisbragur að flestu leyti, en við þurfum að huga betur að krökkunum sem eru að flytja til landsins. Það vita allir af vandamálinu en það er ekki búið að finna lausnina ennþá. Við höldum að maður á mann aðferðin sé best. Það verður að tala við fólk til að ná árangri,“ segir hún að lokum að því er fram kemur í tilkynningu.