Maíspá Siggu Kling - Tvíburinn: Lífið er að bíða eftir þér

Elsku spennandi Tvíburinn minn. Það er í eðli þínu að vakna í maí og fara svo að sofa í september, um leið og náttúran fer á flug í kringum þig þá færðu þennan ofurkraft sem hjálpar þér að ryðja í burt öllu sem var að drepa þig úr áhyggjum fyrir nokkrum mánuðum.

Þú ert búinn að vera svo ofsalega sterkur síðustu fjóra mánuði og ganga í gegnum svo mikið en núna sé ég að þú fagnar eins og enginn sé morgundagurinn! Það er mikil spenna í ástinni og það er algerlega í þínum höndum hvort þú búir til drama eða dásamlega sögu úr henni.

Dásemdarplánetan Merkúr er að dansa í kringum þig og sá kraftur mun hjálpa þér með orð en það magnaðasta í lífinu að mörgu leyti er einmitt að vera orðheppinn. Slepptu öllum plönum sem tengja þig við Excel, hentu þér út í frjálst fall því lífið er að bíða eftir þér. Staðan hjá þeim sem hafa áhyggjur af húsnæði eða stað til að vera á leysist og það mun valda þér furðu að það sem þig vantar er nákvæmlega beint fyrir framan nefið á þér, ekki skrefinu lengra í burtu en það.

Þetta er sumarið sem þú ættir að halda dagbók, það verður svo skoppandi skemmtilegt! En að sjálfsögðu munt þú stíga ofan í einhverja drullupolla en það verður þér alls ekki skaðlegt, heldur mun það leiða til þess að þú trítlar aðeins annan veg en þú bjóst við.

Það getur verið svolítið erfitt hjá þér að taka ákvörðun. Pínulítil orka vogarinnar er staðsett inni í þessu merki og ef eitthvað bindur þig niður og heldur föstum er það bara ákvörðunarleysi og þar af leiðandi þér að kenna elskan mín en ekki alheiminum. Hafðu trú á að sú ákvörðun sem þú tekur sé rétt, ekki láta aðra segja þér hvað þú vilt því að manneskjan sem situr við stýrið í þessu lífsferðalagi ert þú sjálfur. Þú skalt því skrifa þetta handrit með skemmtilegu ívafi.

Þú átt svo að vita að innra með þér býr listamaður – þú skalt prófa að gera nýja hluti eða bæta þá hluti sem þú kannt fyrir. Þú þarft að ögra þér og fara út úr þægindahringnum að þessu leyti, vegna þess að þú ert sko ekki steingeit!

Mottó: Sumarið er tíminn.

Knús og kossar, Sigga Kling

Frægir Tvíburar: Ragnar Sigurðsson landsliðsmaður, Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland, Donald Trump, Þórarinn Þórarinsson blaðamaður, Bjartmar Guðlaugsson, söngvari og snillingur.