Maíspá Siggu Kling - Vogin: Þú ert að fara inn í dásamlegan djass í lífi þínu

Elsku Vogin mín, þú ert svo dásamlega til í lífið og vilt að það gangi allt upp hjá öllum í kringum þig. Í þessari orku áttu það til að detta á hausinn því þú manst ekki að þú þarft að standa með sjálfri þér, vera þinn besti vinur og byggja þig upp eins og þú værir á sjálfseflingarnámskeiði. Hamingjan bankar ekki upp á bara rétt si svona, þú býrð hana til með orðum, gjörðum og hugsunum.

Þú verður að vera viðbúin því að það er enginn sem hjálpar þér að ná árangri. Þú þarft að hafa trú á þínu verkefni sem lífið er og láta þig vaða í þá starfsemi. Þú hefur svo mikla yfirburði í útgeislun, fegurð og smartheitum að það er einhvern veginn lykilorðið að þínu lífi. Þú ert afskaplega tengd orku jarðar og himinhvolfs svo þú finnur inni í innstu hjartans rótum þegar er djúp lægð nálgast, stórstreymt er, fullt tungl og svo framvegis.

Þú ert að fara inn í dásamlegan djass í lífi þínu, orkan er að spila með þér sama tón og þú hefur í höfðinu. Það er eins og þú sért að fá fullt af gjöfum sem í raun og veru er langt síðan þú áttir að fá, en núna er tíminn. Ástin, spennan og sumarið munu syngja með þér svo dásamlega söngva að þú týnist í þessu tímabili. Það er mjög mikilvægt að þú takir barnið út úr hjartanu á þér og lærir að leika þér upp á nýtt, því leikurinn gefur þér allt.

En ef biturð og reiði skyggja á huga þinn þá færðu ekki þessa stórkostlegu upplifun sem ég er að skila til þín. Þegar þú varst ung hugsaðir þú öðruvísi en annað fólk, þú ert alltaf eitthvað á undan. Þú hefur svo mikla hæfileika sem þú þarft að deila með öðru fólki og það er þitt val ef þú vilt staðna í einhverju sem er ekki neitt eða halda áfram!

Mottó: It‘s now or never.

Knús og kossar, Sigga Kling

Frægir í Voginni: Kári Árnason landsliðsmaður, Glúmur Baldvinsson stjórnmálafræðingur, Hjalti flugþjónn, Ingi í Sign, Jón Axel Ólafsson athafnamaður, Matt Damon leikari, Íris Berg, fatahönnuðurinn minn, Mary Poppins, Svanhildur Hólm Valsdóttir, aðstoðarmaður ráðherra og sjónvarpskona, Hanna Birna Kristjánsdóttir, Lilja Dögg Alfreðsdóttir alþingiskona, Ósk Gunnarsdóttir útvarpskona, María Einarsdóttir ritari stjörnuspánnar, Arnþrúður Karlsdóttir útvarp Saga, Skúli Mogensen, Hulda Hólmkelsdóttir fréttakona, Walter Matthau, Olavia Newton John, Ragga Gísla, Steinn Steinarr, Margret Thatcher, Ragnheiður Elín Árnadóttir, minn meistari.