Klopp óttaðist um sína gömlu leikmenn hjá Dortmund

Jürgen Klopp, knattspyrnustjóri Liverpool, hafði miklar áhyggjur af sínum gömlu leikmönnum þegar hann frétti af sprengjunum við liðsrútu Borussia Dortmund á þriðjudagskvöldið.

Jürgen Klopp var í sjö ár hjá Borussia Dortmund og fékk marga af núverandi leikmönnum til þýska liðsins. Hann þekkir því vel flesta leikmennina og allar aðstæður hjá Dortmund.

„Eins og allir geta örugglega ímyndað sér að þetta var mjög erfiður tími fyrir mig. Ég get ekki talið hversu oft ég gisti á þessu hóteli á síðustu árum. Ég veit líka nákvæmlega hvernig aðstæðurnar eru á veginum og þá voru fullt af vinum mínum í rútunni,“ sagði Jürgen Klopp á blaðamannfundi fyrir komandi leik hjá Liverpool.

„Ég reyndi um leið að afla mér upplýsinga um hvað hafði gerst. Ég hafði miklar áhyggjur og óttast um leikmennina og alla sem voru í rútunni,“ sagði Klopp.

„Ég vildi samt vera að trufla þá með asnalegum spurningum svo að ég þurfti að bíða eftir fréttum eins og allur heimurinn. Það síðasta sem ég var að hugsa um á þeirri stundu var leikurinn,“ sagði Klopp.

„Ég horfði á leikinn í gærkvöldi og ég skil hundrað prósent af hverju hann var spilaður daginn eftir. Það er virkilega, virkilega erfitt að finna dagsetningu inn á þessari þéttu leikjadagskrá en allir hefðu örugglega skilið það ef leikmenn Dortmund hefði ekki viljað spila leikinn,“ sagði Klopp.

„Ég var samt virkilega stoltur af Dortmund, hvernig þeir brugðust við og hvernig þeir bjuggu til þetta andrúmsloft. Leikurinn var ekki mikilvægur í þessu samhengi en þeir gerðu sitt besta,“ sagði Klopp.

„Ég sá það samt í augum minna gömlu leikmanna eftir leikinn að þeir voru í sjokki. Það mun taka langan tíma fyrir þá að vinna sig út úr þessu,“ sagði Klopp.