Mikilvægt að skapa víðtæka sátt um stjórnarskrárbreytingarnar

Framkvæmdastjórn Evrópusambandsins segir að yfirvöld í Tyrklandi ættu að sækjast eftir víðtækri sátt um fyrirhugaðar stjórnarskrárbreytingar sem samþykktar voru í þjóðaratkvæðagreiðslu í dag.

„Í ljósi þess hve mjótt var á munum og hve miklar breytingar eru fyrirhguaðar á stjórnarskránni biðjum við tyrknesk yfirvöld að sækjast eftir eins víðtækri sátt um breytingarnar og hægt er,“ segir í yfirlýsingu frá framkvæmdastjórninni.

Þar segir einnig að Evrópusambandið muni fylgjast vel með framkvæmd breytinganna vegna þess að Tyrkland er í umsóknarferli um aðild að ESB. Þá muni sambandið bíða eftir niðurstöðum frá eftirlitsstofnunum vegna ásakanna stjórnarandstöðunnar í Tyrklandi um að brögð hafi verið í tafli við framkvæmd kosninganna.

Tyrkland, sem sótti um aðild að Evrópusambandinu árið 2005, hefur gegnt lykilhlutverki við móttöku flóttafólks, þar sem landið er með landamæri að Sýrlandi.

Í þjóðaratkvæðagreiðslunni var kosið um breytingar á stjórnarskrá Tyrklands sem fela í sér grundvallar breytingar á stjórnskipun landsins. Embætti forsætisráðherra verður lagt niður og völd forsetans verða aukin á kostnað þingsins.

Þannig mun Erdoğan hafa forræði yfir fjárlögum Tyrklands, mun geta skipað og veitt ráðherrum lausn frá embætti og mun geta tilnefnt bæði saksóknara og dómara við tyrkneska dómstóla.