Jón Daði hafði betur gegn Aroni Einari

Wolves vann sinn fjórða leik í röð þegar liðið lagði Cardiff City að velli, 3-1, í Íslendingaslag í ensku B-deildinni í dag.

Aron Einar Gunnarsson spilaði allan leikinn fyrir Cardiff en Jón Daði Böðvarsson spilaði síðustu 17 mínúturnar í liði Úlfanna.

Aron Einar og Jón Daði voru einu Íslendingarnir sem komu við sögu hjá sínum liðum í ensku B-deildinni í dag.

Ragnar Sigurðsson sat allan tímann á varamannabekknum þegar Fulham vann 0-1 útisigur á botnliði Rotherham.

Sömu sögu var að segja af Herði Björgvini Magnússyni sem spilaði ekkert í 2-0 tapi Bristol City fyrir Brentford.

Þá er Birkir Bjarnason enn frá vegna meiðsla hjá Aston Villa sem vann 2-0 sigur á Norwich. Þetta var þriðji sigur Villa í röð.