Utangarðsmenn dáið í nágrenni gistiskýlisins á Lindargötu að undanförnu

Sonur 87 ára konu sem býr við Lindargötu segir vítavert að Reykjavíkurborg axli ekki ábyrgð á skjólstæðingum gistiskýlis í götunni allan sólarhringinn. Einn af skjólstæðingum skýlisins féll á aldraða móður hans með þeim afleiðingum að hún fótbrotnaði. Dæmi eru um að skjólstæðingar skýlisins hafi andast í nágrenni við skýlið að undanförnu.

Íbúar við Lindargötu í Reykjavík eru margir hverjir ósáttir við gistiskýli fyrir utangarðsmenn sem er í götunni. Í kvöldfréttum Stöðvar 2 í gær sagði Elín Magnúsdóttir, sem 86 ára, að hún væri hrædd við að fara ein út eftir að utangarðsmaður ógnaði henni. Hún á heima á Lindargötu 59 en við Lindargötu 48 rekur Reykjavíkurborg gistiskýli fyrir utangarðsfólk.

Fleiri nágrannar eru ósáttir við gang mála. Þeir segja að þegar utangarðsmennirnir fari út á morgnanna hangi þeir í hverfinu allan daginn þar sem þeir eigi í engin hús að venda. Mennirnir séu mjög illa á sig komnir margir hverjir, með læti og gerir þarfir sínar í garða nágrannanna. Undir þetta tekur starfsmaður dvalarheimilis fyrir aldraða á Lindargötu.

Sjá einnig: Utangarðsmenn gera þarfir sínar í garð nágrannanna

Þá hefur það komið fyrir oftar en einu sinni að þeir ógni nágrönnum.

„Það var þannig að móðir mín fór út að ganga í sinn daglega göngutúr hér í hverfinu. Þegar hún var að labba hér hjá tröppum þá sat þar dauðadrukkinn maður og hann spratt upp og féll á hana með þeim afleiðingum að hún fótbrotnaði og átti í því í langan tíma,“ segir Einar Örn Gunnarsson.

Eftir atvikið, sem átti sér stað árið 2015, tók við langt ferli og var móðir Einars á spítala í 8 vikur. Eftir að þetta gerðist er móðir Einars mjög hrædd að fara ein út að ganga.

Skjólstæðingar á kvöldin en gaddurinn á daginn

„Við erum líka mjög smeykt vitandi af henni úti að ganga undir þessum kringumstæðum og með þá vissu að hér séu dauðadrukknir menn, sem eru viti sínu fjær, að vandra um hverfið og eru til alls vísir.

Einar segir að Reykjavíkurborg verði að bregðast við.

„Maður veltir fyrir sér hver er ábyrgð borgarinnar að bjóða eldri borgurum upp á það að hafa þessa starfsemi hér við hliðina. Að velja gistiskýlinu stað við hliðina á vernduðum þjónustuíbúðum,“ segir Einar. „Mér finnst líka vítavert beinlínis það að borgin lítur á þessa menn sem skjólstæðinga sína yfir hánóttina meðan þeir sofa en um morguninn um leið og þeir vakna þá er þeim hent út á guð og gaddinn. Þá blasir við að íbúar hér þurfa að axla ábyrgðina.

Sveinn Allan Morthens, forstöðumaður gistiskýlisins segir í samtali við fréttastofu, að hann skilji áhyggjur nágrannanna og að verið sé að vinna að lausn. Ástandið sé slæmt.

Samkvæmt heimildum fréttastofu hafa þó nokkrir utangarðsmenn andast í hverfinu að undanförnu. Til að mynda andaðist einn á Vitatorgi í byrjun árs og annar í hjólageymslu á stúdentagörðunum á Lindargötu í fyrra. Í báðum tilfellunum olli áfengiskrampi dauðanum.