Grunaður um kynferðisbrot gegn tveimur konum

Lögreglan á Suðurlandi handtók í gær mann sem grunaður er um að hafa brotið kynferðislega gegn tveimur konum á hóteli á Suðurlandi í gærmorgun. Héraðsdómur Suðurlands úrskurðaði manninn í gæsluvarðhald í gærkvöldi og verður hann því í haldi fram á föstudag.

Rannsókn málsins er á viðkvæmu stigi samkvæmt lögreglunni, en henni mun miða vel.

Samkvæmt frétt RÚV var maðurinn á árshátíð hjá fyrirtæki sem hann og konurnar starfa hjá. Gistu þau á hótelinu þar sem árshátíðin var haldin. Samkvæmt heimildum RÚV voru konurnar ekki í sama herbergi og mun maðurinn hafa farið á milli herbergja og brotið gegn konunum.