Greiðslur til þingmanna lækkaðar

Forsætisnefnd Alþingis samþykkti á fundi sínum í dag að lækka greiðslur vegna ferðakostnaðar og starfskostnaðar alþingismanna. Ferðakostnaður lækkar um 54 þúsund krónur og starfskostnaður um 50 þúsund krónur.

Formenn flokkanna sem eiga sæti á Alþingi fóru þess á leit við forsætisnefnd í desember að reglur um þingfarakostnað, starfstengdar og fastar mánaðarlegar greiðslur til þingmanna væru teknar til endurskoðunar.

Beiðnin var sett fram í tengslum við afgreiðslu Alþingis á frumvarpi um breytingar á kjararáði og í ljósi gagnrýni sem fram kom á kjör þingmanna á opinberum vettvangi eftir úrskurð kjararáðs í lok októbers sem fól í sér um 45 prósenta hækkun á þingfararkaupi.

Í bréfi sem Unnur Brá Konráðsdóttir, forseti Alþingis, sendi á fjölmiðla, segir að hún hafi lagt til á fundi forsætisnefndar í dag að lækka greiðslur fyrir ferðakostnaði í kjördæmi og starfskostnaði.

Ferðakostnaður lækkar um 54 þúsúnd krónur og starfskostnaður lækkar um 50 þúsund krónur. Í bréfinu segir að hafa beri í huga að kostnaðargreiðslur séu ekki hugsaðar sem laun, þær eru skattfrjálsar að hluta, og verði því að uppreikna þær ef jafna á til launa.

Í bréfinu segir að jafna megi lækkun ferðakostnaður við 100 þúsund krónur í launagreiðslu og því megi jafna samanlagðri lækkun við 150 þúsund krónur fyrir skatt, sem sé í samræmi við beiðni formanna flokkanna.

Á fundi forsætisnefndarinnar var enn fremur samþykkt að taka núverandi lög um þingfararkaup og þingfararkostnað til endurskoðunar þar sem leiðarljósið verður einföldun og gagnsæi.