Mótmæla að fá ekki fulltrúa í samráðshópi um búvörusamninga

Stjórn Samtaka afurðastöðva í mjólkuriðnaði (SAM) hefur mótmælt því harðlega að enginn fulltrúi afurðastöðva hafi verið tilnefndur í samráðshóp um endurskoðun búvörusamninga.  

Þorgerður Katrín Gunnarsdóttir, sjávarútvegs- og landbúnaðarráðherra, hefur breytt skipan samráðshóps um endurskoðun búvörusamninga. Svanfríður Jónasdóttir tekur við formennsku og skipan þriggja fulltrúa af fimm sem fyrri ráðherra skipaði hefur verið afturkölluð.

Í yfirlýsingu frá SAM segir að stjórnin telji að með skipan hópsins sé ekki farið að lagaákvæðum um skipan samráðshópsins. 

„Í 60. grein laga um breytingu á búvörulögum, búnaðarlögum, tollalögum og lögum um velferð dýra, sem samþykkt voru á Alþingi 13. september 2016, segir orðrétt, með undirstrikun SAM:

„Eigi síðar en 18. október 2016 skal sjávarútvegs- og landbúnaðarráðherra skipa samráðshóp um endurskoðun búvörusamninga.  Tryggja skal aðkomu afurðastöðva, atvinnulífs, bænda, launþega og neytenda að endurskoðuninni.“

Samkvæmt tilkynningu um skipan samráðshópsins eiga aðilar sem taldir eru upp í tilvitnaðri lagagrein fulltrúa í samráðshópnum og sumir marga fulltrúa – allir aðrir en afurðastöðvar.

Í frétt ráðuneytisins um breytta skipan samráðshópsins segir m.a.: „..að mikilvægt sé að víðtæk samvinna og sátt náist um breytingar á búvörusamningi og búvörulögum.“  Í ljósi þess að afurðastöðvar eiga ekki sæti í samstarfshópnum harmar stjórn SAM hve takmörkuð samvinnan virðist eiga að vera og telur að takmörkunin minnki líkur á að sátt náist um hugsanlegar breytingar á búvörusamningi og búvörulögum,“ segir í yfirlýsingunni.