Tugir skáta lýsa yfir van­trausti á skáta­höfðingja

Fjörutíu og fimm skátar hafa lýst yfir vantrausti á skátahöfðingjann Braga Björnsson og aðstoðarskátahöfðingjann Fríðu Finnu Sigurðardóttur vegna framgöngu þeirra í eineltismáli innan skátafélagsins Ægisbúa og brottvikningu framkvæmdastjóra Bandalags íslenskra skáta, Hermanni Sigurðssyni.

Þessir fjörutíu og fimm skáta lögðu nafn sitt við þessa yfirlýsingu á opnum fundi skáta sem haldinn var í Jötunheimum í Garðabæ 2. janúar síðastliðinn.

Fundurinn var fyrst ætlaður foringjum skátafélaga en ákveðið var að opna fundinn öllum skátum. Hann sóttu 15 félagsforingjar af 26 skátafélögum en alls voru þar um 60 manns.

Krefjast aukaþings

Þeir sem rituðu undir þessa yfirlýsingu hafa jafnframt skorað á stjórnir skátafélaga að krefjast aukaskátaþings nú þegar samkvæmt lögum Bandalags íslenskra skáta þar sem fjallað verður um fyrrgreint vantraust á skátahöfðingjann og aðstoðarskátahöfðingjann. Meirihluti skátafélaga getur farið fram á slíkt aukaþing.

Er þess krafist að aukaskátaþingið verði haldið á höfuðborgarsvæðinu eigi síðar en laugardaginn 4. febrúar næstkomandi.

Búið að boða alla félagsforingja á fund stjórnar

Í kvöld er fyrirhugaður fundur stjórnar Bandalags íslenskra skáta en þau Bragi og Fríður Finna eiga sæti í stjórninni.

Stjórnin hefur nú þegar boðað alla foringja skátafélaga á fund 14. janúar næstkomandi þar sem ætlunin er að fara yfir málið með þeim.

Uppsögn vakti undran

Vísir greindi frá óánægju innan skátahreyfingarinnar vegna uppsagnar framkvæmdastjórans í desember síðastliðnum. Uppsögnin olli undran á meðal skáta þar sem stutt er síðan ráðningarsamningur við Hermann Sigurðsson, framkvæmdastjóra skátahreyfingarinnar, var framlengdur um þrjú og hálft ár.

Þá er risaverkefni fyrirhugað innan skátahreyfingarinnar næsta sumar þar sem alþjóðlegt skátamóti, World Scoot Moot, verður haldið hér á landi en þar koma saman 5.000 skátar frá öllum heimshornum.

Var það samþykkt af stjórn Bandalags íslenskra skáta að segja Hermanni upp en kallað hefur verið eftir skýringum á þeirri uppsögn innan skátahreyfingarinnar.

Framkvæmdastjórinn hafði tekið á eineltismáli

Hafði framkvæmdastjórinn nýverið tekið á eineltismáli sem kom upp innan hreyfingarinnar.

Bragi Björnsson skátahöfðingi hefur látið hafa eftir sér að ástæða uppsagnarinnar sé sú að komið hafi upp trúnaðarbrestur milli framkvæmdastjóra og stjórnar. Meirihluti stjórnar hafi því komist að þeirri niðurstöðu að rétt væri að ganga til samninga um starfslok.

Bragi sagði jafnframt að eineltismálið tengist ekki uppsögninni en kæran vegna eineltisins fór fyrir stofnun innan Bandalags skáta sem nefnist skátaréttur.