Jaðarhópar á Íslandi sameinist

Samtökin ´78, Trans Ísland og feminíska fötlunarhreyfingin Tabú standa fyrir ráðstefnu og grasrótarhátíð í dag og á morgun undir yfirskriftinni Truflandi tilvist.

Einn skipuleggjandi ráðstefnunnar segir kominn tíma til að aktivistar í jaðarhópum taki höndum saman.

„Við erum á pínulitlu landi og allir sem eru að tala hér í dag tilheyra jaðarsettum hópum. Það er svo mikilvægt að við komum saman, lærum hvert af öðru en séum ekki hvert í sínu horni,“ segir Auður Magndís Auðardóttir en þetta er í fyrsta skipti sem minnihlutahópar koma saman með svo skipulögðum hætti.

„Það hefur ekki verið gert mikið af því á Íslandi að feitt fólk sé að tala við transfólk sem er að tala við BDSM fólk sem er að tala við fatlað fólk sem er að tala við hinsegin fólk. Það er einhver fiðringur í loftinu – fólk er spennt fyrir þessu,“ seir Auður.

Fulltrúi frá hverjum hópi hélt örfyrirlestur á ráðstefnunni til að veita innsýn í líf sitt, hvernig fordómar birtast þeim og hvað sé mikilvægt í réttindabaráttunni.

Þar á meðal fulltrúi frá BDSM á Íslandi en það er stutt síðan félagar í BDSM fóru að tjá sig opinberlega um reynslu sína.

Margrét Nilsdóttir sagði frá reynslu sinni sem undirgefin BDSM og feministi og hvernig það getur stangast á að tilheyra tveimur jaðarhópum. En hún segist fagna því að hafa fengið boð um að taka þátt í ráðstefnunni.

„Bara það að fá að skilgreina sig, að hitta aðra sem skilgreina sig á svipaðan hátt og fá að vita að maður stendur ekki einn, að  maður standi með öðrum og aðrir hópar séu tilbúnir að viðurkenna tilvist manns er mjög valdeflandi og hjálpar vonandi öðrum í framtíðinni,“ segir Margrét. ]