Boðin staðgreiðsla fyrir Laugaveg 31

Tilboð M3 Capital ehf. í Kirkjuhúsið var staðgreiðslutilboð en ekki hefur fengist upp gefið hvað tilboðið hljóðaði upp á. Kirkjuráð hafnaði því, og reyndar öllum öðrum tilboðum, á þeirri forsendu að þau uppfylltu ekki væntingar.

Þegar húsnæðið við Laugaveg 31 var auglýst til sölu var búist við að eignin færi á yfir milljarð.

Sverrir Kristinsson, fasteignasali hjá Eignamiðlun, sagði þá að ekki væri hægt að áætla verðið út frá meðalverði á atvinnuhúsnæði í miðbænum. „Þetta er eitt allra fallegasta húsið í miðborg Reykjavíkur og er ein af þessum gull­eignum í bænum – þetta fer í hæsta flokk,“ sagði Sverrir í lok janúar þegar húsið var auglýst til sölu.

Lengi hefur verið rætt innan raða kirkjunnar að selja húsið en það er 1.542 fermetrar, á fjórum hæðum með kjallara og komið að viðhaldi.

Klofningur varð í atkvæðagreiðslu um söluna í kirkjuráði síðastliðinn föstudag. Þrír af fimm ráðsmönnum greiddu tillögu Agnesar Sigurðardóttur biskups atkvæði, en hún er forseti ráðsins. Gísli Gunnarsson sat hjá og Stefán Magnússon var á móti.

Stefán segir að tilboðið hafi verið gott og engin ástæða til að hafna því.

„Þetta mál blasir við mér þannig að það er búið að tala lengi um að selja eignina og kirkjuráð ákvað í janúar að auglýsa hana til sölu. Að sjálfsögðu var það bundið því að það kæmi ásættanlegt tilboð. Það tilboð sem var hæst var mjög ásættanlegt, gott og ástæða til að taka því,“ segir hann.

Stefán vildi taka tilboðinu og var sá eini sem hafði þann vilja. „Það er miður að þetta fór svona.“