Snýr við ákvörðun um að fella niður mál á hendur Öldu Hrönn

Bogi Nilsson, settur ríkissaksóknari í máli Öldu Hrannar Jóhannsdóttur, aðallögfræðings lögreglunnar á höfuðborgarsvæðinu, hefur snúið við ákvörðun setts héraðssaksóknara í málinu, Lúðvíks Bergvinssonar, um að fella málið niður.

Þetta kemur fram í frétt RÚV. Segir að lögreglufulltrúi, sem aðstoðaði Lúðvík við málið, hafi verið vanhæfur vegna ummæla sem hann lét falla um Öldu Hrönn á Facebook, nokkrum dögum eftir að ákvörðun setts héraðssaksóknara um niðurfellingu málsins lá fyrir.

Málið á hendur Öldu Hrönn var fellt niður í síðasta mánuði þar sem settur héraðssaksóknari taldi eftir rannsókn málsins litlar líkur á sakfellingu.

Í frétt RÚV kemur fram að í ummælum sínum á Facebook hafi lögreglufulltrúinn sagt að sér hafi fljótt orðið ljóst að kærurnar á hendur Öldu Hrönn væru með öllu tilhæfulausar og málinu hefði átt að ljúka mun fyrr. Þá væri lögreglan á Íslandi vel sett þegar kona eins og Alda Hrönn væri þar í forystu. Ríkissaksóknari hefur því lagt fyrir settan héraðssaksóknara að taka málið aftur til efnislegrar meðferðar.

Málið á rætur sínar að rekja til LÖKE-málsins svokallaða, en Alda Hrönn rannsakaði það á þeim tíma þegar hún var staðgengill lögreglustjóra á Suðurnesjum. Gunnar Scheving Thorsteinsson lögreglumaður og starfsmaður Nova kærðu Öldu Hrönn fyrir brot á friðhelgi einkalífs þeirra, aðdróttanir í þeirra garð og hvernig rannsókn hennar á LÖKE-málinu, sem snerist um að myndum hefði verið dreift úr lokuðu kerfi lögreglunnar, hafi verið unnin.

Deilt hefur verið um hvort Alda Hrönn hafi haft vald til þess að hefja rannsókn á samskiptum lögreglumannsins. Málið var fyrst skráð í apríl 2014 í skráarkerfi lögreglu en rannsókn Öldu Hrannar hófst hins vegar að öllum líkindum í byrjun september árið áður. Samkvæmt lögreglulögum hafi hún ekki haft vald til að rannsaka störf lögreglumanns, aðeins ríkissaksóknari hafi haft það vald.