Maíspá Siggu Kling - Sporðdrekinn: Þú ert í rosalegri orku til að ná fram óskum þínum

Elsku Sporðdrekinn minn! Þú ert svo athyglisverður að heimurinn er heppinn að eiga þig. En þú þarft að reyna að vera óttalaus og hugrakkur, sem er í raun sama orðið, því þú geislar af svo líkamlegu aðdráttarafli og ert sannkallaður orkubolti! En þú ert aldrei nógu sáttur við útlit þitt, líkama eða þú getur eiginlega alltaf fundið þér eitthvað til foráttu. Þú verður að fatta að þú ert samt engum líkur, því þú ert bæði svo skemmtilegur og svo kryddarðu allt með svo dásamlegum húmor.

Þú ert náttúrlega forystusauður og til þess að það gangi vel þarftu að skilja að þú ert númer eitt, tvö og þrjú. En það er eins og þú þarfnist staðfestingar á því hversu hæfileikaríkur og heillandi þú ert.

Þú þarft að taka tillit til þín og þinna tilfinningaþarfa og vera sáttur við sjálfan þig, amen! Og amen þýðir að svo mun verða. Þú munt aldrei nokkurn tímann leggja á flótta og þegar þú horfist í augu við erfiðleika muntu sigra þá því þú ert með hjarta úr gulli og það rímar við að þú nennir ekki neinu bulli!

Það hlusta allir á það sem þú segir og þú getur átt það til að særa fólk í kringum þig eins einlægur og æðislegur og þú ert, en fólk í kringum þig má líka hafa skoðanir eins og þú og það veistu. Þú hefur yfirburðastöðu í þessu tafli næstu vikur og þú þarft að þora að tefla fram þínu besta. Þú getur ekki látið öllum líka við þig og þér þarf að vera dálítið skítsama. Því ef þú elskar þig og geislar af því þá elskar fólkið þitt þig líka, allavega þeir sem skipta máli og ef þeir skipta ekki máli þá skiptir það heldur engu máli!

Þú ert í rosalegri orku til að ná fram óskum þínum, ekki gefa neinn afslátt því að útkoman sem þú færð er vegna þess að þú ert búinn að vera góður við fólk. Fröken Karma er að gefa þér ávísanir og útkomu sem þú átt svo sannarlega skilið vegna velvildar þinnar til annarra. Það er ekki eins og þú hafir beðið um eitthvað, en núna færðu það sem þú átt skilið. Ef þú fengir eitthvert mottó væri það: „Það geta ekki allir verið sexí nema ég,“ dregið af laglínunni hans Palla sem er náttúrulega bestur!

Mottó: Lífið er yndislegt.

Knús og kossar, Sigga Kling

Frægir Sporðdrekar: Birkir Már Sævarsson landsliðsmaður, Dísa í World Class, Helga Braga Jónsdóttir leikkona, Björk Guðmundsdóttir söngkona, Scarlett Johansson leikkona, Whoopie Goldberg leikkona, Sigríður Elva Vilhjálmsdóttir sjónvarpskona, Emmsjé Gauti rappari, Björk, Indira Ghandi, Karl bretaprins, Hillary Clinton, Leonardo DiCaprio, Magnús Scheving,  Steingrímur Sævarr Ólafsson fjölmiðlaráðgjafi.