Stefán hefur tekið upp yfir 70 myndbönd á ferð sinni um heiminn

Kvikmyndagerðamaðurinn Stefán Þór Þorgeirsson frumsýnir nýja heimildarmynd: A Martian Guide to Tokyo, þar sem hann ferðast um Tokyo, höfuðborg Japan, og segir frá helstu matarvenjum, afþreyingu og menningu.

Þetta er önnur heimildarmynd Stefáns um Japan en í sumar gaf hann út Youth in Japan sem fjallar um ungmenni í Japan og þeirra sýn á framtíð landsins.

Stefán er betur þekktur undir nafninu Martian Travels á YouTube en þar má finna yfir 70 myndbönd af ferðalögum hans. Þau fjalla að mestu leiti um gönguferðir, útilegur og ævintýraferðamennsku, jafnt á Íslandi sem og úti í heimi, en Stefán hefur búið í Japan og Kosta Ríka.

„Ferðalög og ævintýri eru mér mikil ástríða. Ég reyni að vera sem mest úti í náttúrunni eða að upplifa öðruvísi menningu, og tek myndavélina alltaf með mér. Þetta er mín leið til að segja sögur,“ segir Stefán.

Í nýjustu heimildarmyndinni, A Martian Guide to Tokyo, ferðast Stefán um höfuðborgina með kærustu sinni og vini frá Íslandi ásamt mörgum japönskum vinum og kunningjum en Stefán talar reiprennandi Japönsku.

„Ég var í skiptinámi í Japan árin 2011-2012 og hef búið vel að því. Þessi heimildarmynd var tekin upp á nokkrum dögum í nóvember síðastliðnum en það var í fimmta skipti sem ég fór út. Ég reyni að fara til Japan á hverju ári, landið er bara svo heillandi.”

Framundan hjá Stefáni eru tökur á fleiri ferðalögum á Íslandi sem og stutt heimildarmyndbönd um jólamenninguna í Reykjavík.

Fylgjast má með ævintýrum hans á YouTube undir nafnininu: Martian Travels, og sömuleiðis á Instagram og Facebook undir sama nafni.