Íslenski atvinnukylfingurinn Ólafía Þórunn Kristinsdóttir átti mjög flottan fyrsta hring á LPGA Volvik meistaramótinu á Ann Arbor vellinum við Detroit í Bandaríkjunum en þetta mót er hluti af LPGA mótaröðinni.
Ólafía Þórunn lék átján holurnar á 69 höggum eða þremur höggum undir pari vallarins.
Hún var einu höggi yfir pari eftir fimm fyrstu holurnar en náði þá þremur fuglum á fjórum síðustu holum á fyrri níu. Ólafía lék síðan seinni níu holurnar á einu höggi undir pari og fékk samtals fjóra fugla á þessum hring.
Ólafía Þórunn er eins og er í sjötta sæti á mótinu en margar eiga eftir að ljúka leik á fyrsta hringnum og því gæti hún færst eitthvað niður á listanna í dag.
Ólafía Þórunn fékk nýjan aðstoðarmann á LPGA Volvik mótinu en þar mætti til leiks þaulreyndur atvinnukylfuberi. Thomas Bojanowski, unnusti Ólafíu Þórunnar, var aðstoðarmaður hennar á Kingsmill meistaramótinu í Williamsburg í síðustu viku.
Eftir þessa góðu byrjun á Ólafía Þórunn ágæta möguleika á því að ná lokaniðurskurðinum í fyrsta sinn síðan á ISPS Handa mótinu í Ástralíu í febrúar.
Ólafía Þórunn hefur ekki komist í gegnum niðurskurðinn á síðustu fimm LPGA-mótum sínum en þetta er besta byrjun hennar á móti síðan á Bank of Hope mótinu um miðjan mars.
Þetta er annað mótið hennar í fjögurra móta törn því hún á síðan eftir að keppa á ShopRite LPGA Classic í New Jersey 2. til 4. júní og svo á Manulife LPGA Classic mótinu í Toronto 8. til 11. júní.
Ólafía Þórunn hefur nú þegar leikið á sjö mótum á LPGA mótaröðinni frá því í janúar. Hún komst í gegnum niðurskurðinn á fyrstu tveimur mótunum en síðan þrjú mót í röð þar sem hún komst ekki í gegnum niðurskurðinn. Á sjötta mótinu komst hún í gegnum fyrri niðurskurðinn eftir 54 holur en hún komst ekki í gegnum niðurskurðinn á síðasta móti i Williamsburg.
Afturelding
KR
