Ójafnt aðgengi barna að Skólaþingi sökum búsetu

Af þeim 39 grunnskólum sem sóttu Skólaþingið síðasta vetur eru aðeins þrír utan suðvesturhornsins. Á Skólaþinginu gefst grunnskólanemendum kostur á að setja sig í spor þingmanna og efla skilning sinn og þekkingu á stjórnskipulagi landsins og lýðræðislegum vinnubrögðum.

Skólaþingið er kennsluver Alþingis þar sem tækifæri gefst til að setja sig í spor þingmanna. Með Skólaþinginu er komið til móts við áhuga skóla á því að koma með nemendur í vettvangsferðir á Alþingi. Skólaþinginu er þannig ætlað að auka fjölbreytni í fræðslu um Alþingi. Hins vegar eru engir styrkir veittir til grunnskóla fjarri höfuðborgarsvæðinu til að kynnast störfum löggjafarvaldsins.

Brynhildur Pétursdóttir, þingmaður Bjartrar framtíðar, segir mikilvægt að tryggja að allir hafi jafnan aðgang að þessu námi. „Þarna fer fram mikilvæg fræðsla um Alþingi og mér sýnist aðsóknin mjög góð. Þessi fræðsla er hins vegar illa aðgengileg skólum utan höfuðborgarsvæðisins enda staðsett í miðbæ Reykjavíkur. Auðvitað eiga öll börn rétt á þessari fræðslu óháð búsetu og það verður að tryggja. T.d. mætti styrkja skóla til ferðalagsins, nú, eða gera Skólaþingið að hluta hreyfanlegt.“

Þeir þrír skólar sem sendu nemendur utan SV-hornsins eru grunnskólarnir á Seyðisfirði, Flúðum og á Drangsnesi. Hinir 36 grunnskólarnir eru allir í borginni eða nágrenni hennar.

Einar K. Guðfinnsson, forseti Alþingis, segist vera sammála Brynhildi. 

Fréttin birtist fyrst í Fréttablaðinu 23. júní 2016