Mikið af óvenjulegum stöðum í Breiðholtinu

Hátíðin Breiðholt Festival verður haldin í annað sinn sunnudaginn 14. ágúst klukkan eitt og stendur yfir allan daginn. Á hátíðinni koma fram ýmsir listamenn af öllum sviðum listsköpunar. Í boði verða tónleikar þar sem spila til dæmis Hermigervill, Pascal Pinion og Daníel Bjarnason – það verður hægt að hlýða á kóra og myndlist verður til sýnis, vinnustofur og alls kyns aðrir viðburðir hér og þar um svæðið. Hátíðin mun fara fram í og við skúlptúragarð Hallsteins Sigurðssonar myndhöggvara, en Hallsteinn sjálfur verður með opna vinnustofu á svæðinu þar sem verða til sýnis smærri verk eftir hann.

„Við prufukeyrðum þetta í júní í fyrra. Það gekk bara vonum framar, við fengum geggjað veður, fína umfjöllun og góða mætingu – þannig að við höldum ótrauð áfram,“ segir Sigríður Sunna Reynis­dóttir, einn af skipuleggjendum hátíðarinnar.

En af hverju Breiðholtið og hvernig varð þessi hugmynd um festival þar til?

„Við Valgeir Sigurðsson, sem erum listrænir stjórnendur hátíðarinnar, vorum einfaldlega í göngutúr um Breiðholtið, okkar heimahverfi, og allt í einu fórum við að horfa á það með gests augum og áttuðum okkur á því að hér væri allt til alls til að halda góða hátíð – eins og skemmtilegir og óvenjulegir staðir.

Við erum líka bæði listamenn, ég í leikhúsi og hann í tónlist, og erum því mikið í því að fara niður í bæ með allan okkar búnað til að taka þátt í viðburðum þar og við bara ákváðum að snúa því við og fá fólk hingað. Svo eru líka per­sónulegar ástæður – við vildum fá fólkið út úr húsunum sínum og til að kynnast nágrönnum, vekja smá líf í hverfinu svo að mannlífið sé ekki svona aðskilið – annars vegar í miðbænum og hins vegar sé það með hálfgerðum svefnbæjarbrag hér í úthverfunum. Síðan fórum við líka að skoða hvað það er mikið af listafólki og hvað það kemur mikil menning úr hverfinu – flestir lykillistamennirnir sem koma fram hafa alist hér upp, búa enn þá í Breiðholti eða hafa unnið hér. Allir listamennirnir hafa tengingu, ólíka þó, við Breiðholt.

Á Facebook-síðu hátíðarinnar erum við að kynna listamennina einn í einu þar sem þeir segja frá tengingu sinni við hverfið og frá uppáhaldsstöðunum sínum – sem varpar nýju ljósi á hverfið. Til dæmis verður Lóa Hlín Hjálmtýsdóttir, tónlistar- og myndlistarkona, með teikningar tengdar Breiðholti og sjálfsævisöguleg skrif sem líka tengjast hverfinu en hún ólst upp hérna í Breiðholti og lærði myndlist í FB.

Ragnheiður Maísól Sturludóttir verður með opna vinnustofu þar sem fólk getur komið við, þar verður svona lítið Breiðholt sem á að rísa úr pappa og heitir Smáholt. Það verður alveg tilvalið fyrir fjölskyldur og vini að eyða smá tíma hjá henni þarna. Það mun lítil Breiðholtskirkja rísa úr pappa, blokkir og önnur mannvirki sem fólk þekkir úr hverfinu.

Við viljum endilega hvetja fólk til að koma með sundföt því að það verður opið í Ölduselslaug sem er yfirleitt ekki opin almenningi, hún er notuð til sundkennslu í hverfinu. Það verða viðburðir þar, það verður hægt að hlusta á hljóðinnsetningu ofan í vatninu, það verður hljómsveit, sundlaugar-zumba og ýmislegt annað þarna ofan í.“

Eins og áður sagði hefst hátíðin klukkan eitt á sunnudaginn 14. ágúst og er frítt að taka þátt í öllum viðburðum hennar.