Loka húsnæði þar sem leigjendur eru í hættu

Slökkvilið höfuðborgarsvæðisins og lögreglan innsigluðu í gær húsið við Köllunarklettsveg 4 eftir að eigandi hússins hafði ekki lagað brunavarnir og farið eftir öðrum tilmælum slökkviliðsins um úrbætur. Húsnæðið er ekki ætlað til búsetu en eigandinn hefur engu að síðu leigt þar út herbergi eins og mörg dæmi eru um víða á höfuðborgarsvæðinu. Íbúar höfðu rýmt vistarverur sínur áður en lögregla mætti á svæðið.

Sjö aðrar byggingar eru í lokunarferli á höfuðborgarsvæðinu og 15 byggingar hafa fengið viðvaranir. Að mati Bjarna Kjartanssonar og Einars Bergmanns Sveinssonar hjá Slökkviliði höfuðborgarsvæðisins eru leigusalar eins misjafnir og þeir eru margir. „Það er fullt af góðu fólki í þessum bransa og er með allt í lagi yfir í algjört djöfulsins dæmi, afsakið orðbragðið,“ segir Bjarni.

Í húsinu á Köllunarklettsvegi var aðeins ein flóttaleið, engar eldvarnir og engar hólfanir. Á efri hæðinni voru herbergi í útleigu og ferlið hefur verið langt og strangt enda vill enginn setja leigjendur á götuna.

„Sums staðar virkar að tala við eigendur en ekki alls staðar og þá endar það húsnæði í lokunarferli. Við fórum með túlk og kynntum fyrir íbúum yfirstandandi aðgerðir. Þá höfðum við frestað aðgerðum um smá stund, ekki af tillitssemi við eigenda heldur til að gefa fólki kost á að finna nýtt húsnæði. Að henda fólki út á götu leysir engan vanda. Lokun er ekki lausn en við verðum að fara þá leið. Við erum að gefa í með lokanir því við höfum séð húsnæði þar sem við teljum ekki raunhæft að hægt sé að bæta úr. Þá þýðir ekkert að fara í þykjustuleik,“ segir Bjarni.

„Það er stundum erfitt að fá leigjendur til að tala við okkur. Fólk hefur ekki í önnur hús að venda og vill ekki missa húsnæðið sitt,“ segir Einar. 

Fjallað var um málið í kvöldfréttum Stöðvar 2 í gær og má sjá fréttina hér að neðan.