Línan milli Kröflu og Rangárvalla við Akureyri er úti

Kröflulína 1 milli Kröflu og Rangárvalla við Akureyri er úti eftir óveður næturinnar. Flutningskerfi Landsnets varð þó annars ekki fyrir neinum stórvægilegum áföllum að því er segir í tilkynningu frá Landsneti.

„Byggðalínuhringurinn er því rofinn fyrir norðan en bilunin hefur ekki haft straumleysi í för með sér en rof á byggðalínuhringnum þýðir skert rekstraröryggi flutningskerfisins.

Viðgerðarflokkur er lagður af stað í bilanaleit fyrir norðan og á höfuðborgarsvæðinu er einnig unnið að viðgerð á Rauðavatnslínu 1, þar sem bilun varð í mastri rétt við tengivirkið á Geithálsi síðdegis í gær en það olli ekki straumleysi. Þá sló spennir í tengivirki á Prestbakka út á þriðja tímanum í nótt en um klukkustund síðar var hann kominn aftur inn.

Kröflulína 1 sló líka út á þriðja tímanum í nótt og er enn úti, eins og fyrr segir, en bilanaleit er hafin. Þá tókst að tengja Vestfirði á ný við meginflutningskerfið á öðrum tímanum í nótt eftir að Geiradalslína 1, milli Glerárskóga og Geiradals, sló úr rétt fyrir klukkan eitt vegna samsláttar. Snjallnetskerfið leysti þá strax út Breiðadalslínu 1 og ræsti upp varaaflsstöðina í Bolungarvík,“ segir í fréttinni á vef Landsnets.